ORANJESTAD (AAN): Diaranson 29 di September, nos planta nacional di television TeleAruba ta cumpli 58 aña di existencia.
Den nomber di gobierno di Aruba, Prome Minister Evelyn Wever-Croes ta felicita esnan cu ta labora y a labora den pasado na TeleAruba pa asina durante di 58 aña ta e medio di comunicacion pa nos akinan na Aruba.
“Mi mes tempo mi tabata mucha nos tabata por a wak masha poco canal na television y TeleAruba tabata un di e uniconan. Nos a lanta cu TeleAruba como e metodo cu ta comunica nos cu otro, con nos ta haña informacion di kico ta sosodiendo na Aruba y rond di mundo y mescos cu mi, indudablemente hopi hende. Den futuro TeleAruba lo sigui hunga e rol importante aki como nos planta nacional pa ta esun cu ta comunica nos cu e resto di comunidad y resto di mundo.
Masha masha pabien y sigui cu e excelente trabaonan pa comunica cu pueblo.
