ORANJESTAD (AAN) – Parlamentario Setty Christiaans- Yarzagaray, den conferencia di prensa di fraccion di MEP,
a elabora tocante e di seis aña cu Aruba a adopta e metanan di Desaroyo Sostenible (SDGs), hunto cu mas of menos di 192 pais rond mundo.
Christiaans-Yarzagaray a expresa palabra di felicitacion na e team di e comision SDGs, pa tur e trabaonan cu a bin ta haci. E parlamentario a menciona no ta un comision di un par di hende sino cu e ta acapara un grupo hopi mas grandi di tur stakeholders, no solamente di departamentonan gubernamental, pero tambe di sector priva, sector Academico y diferente otro personanan cu tin interes riba e tema aki.
E parlamentario a agrega cu e siman aki ta un siman di concientizacion riba e aspecto di metodonan di desaroyo sostenible.
Christiaans-Yarzagaray e bisa cu e tema aki ta hopi importante pa Parlamento pasobra e rol cu e tin ta Legislacion, implementa, cambia y adapta ley, of presenta cierto aspectonan di e ley nobo, parti di SDGs, ta cu el a descubri durante e trayectoria aki, cu tin hopi ley cu mester worde moderniza y adapta, pa asina por acapara y yega na e metanan y na final “in place” pa e por yega na Parlamento.
Pesey, Setty a subraya, ta asina importante pa Parlamento ta na haltura di e proyectonan, e metanan y tur locual tin rond di dje.
El a agrega cu pa logra e metanan aki tin cierto proyectonan cu mester tuma lugar, y esaki ta bay relata den e presupuesto di Aruba. E proyectonan aki tambe lo aparece den e presupuesto pa asina Parlamento aproba esaki.
E parlamentario a bisa cu, por lo tanto, tin un di dos aspecto pakico ta importante pa Parlamento hunga un rol grandi den esaki.
Otro parti ta esun di concientizacion; mirando e hecho cu parlamentarionan ta e representantenan di pueblo, ta nan tarea tambe pa concientiza y educa e pueblo riba kico ta desaroyo sostenible, kico ta locual kier logra. Esaki ta 17 meta diario, cu Parlamento ta yame “Agenda pa 2030”.
“Sigur pa 2030, mundo ta expect di yega na e 17 metanan den un direccion, mirando cu nan ta purba pone un balansa entre desaroyo sostenible, desaroyo economico pero tambe e parti social y medio ambiente”, Setty Christiaans- Yarzagaray a subraya.
Otro aspecto cu e parlamentario a menciona, ta control. “Mirando e hecho cu parti di nos rol den parlamento ta control, nos tin e tarea di monitorea y controla, no solamente e parti di finanzas, pues loke nos ta aproba den presupuesto pero tambe maneho. E hecho cu maneho ta miho dirigi di awo te 2030 den e direccion di desaroyonan sostenible, nos tin un tarea di monitoreo, por lo tanto mirando e cuater puntonan aki, mi ta agrega un di cinco punto cu ta e lenguahe di SDGs”, el a señala.
