Prome Minister Evelyn Wever-Croes a bishita Arubahuis

ORANJESTAD/DEN HAAG (AAN): Prome Minister Evelyn Wever-Croes a bishita Arubahuis

y a wordo ricibi pa Minister Plenipotenciario Suplente mr. Ady Thijsen, directora a.i. di Arubahuis sra. drs. Glenda Hernandez y personal di Arubahuis.

Durante di su bishita premier Wever-Croes tabata tin un combersacion cu Minister Plenipotenciario Suplente mr. Ady Thijsen y directora a.i. di Arubahuis sra. drs. Glenda Hernandez. Despues señora Wever-Croes a tene un reunion cu e personal di Arubahuis. Premier Wever-Croes a papia riba e situacion actual na Aruba; con e isla ta recuperando di e pandemia. Tambe sra. Wever-Croes a bisa cu Gobierno ta inventarisando e rol cu Arubahuis lo mester hunga awor y den futuro.

E mandatario a bisa di ta contento pa mira Arubahuis den su localidad nobo y temporal. Segun premier Wever-Croes awor ta bay start e procedura pa loke ta trata e edificio di Arubahuis. E siguiente paso ta pa bin un “bouw technisch onderzoek” pa determina kico lo mester pasa cu e edificio.

Minister-president a puntra con ta bayendo cu e preparacion pa e yegada di e studiantenan y e cuestion di vivienda. Funcionario di Onderwijszaken di Arubahuis sra. Ivonne Navas a duna un briefing na MP di e situacion actual.

Na final premier Wever-Croes a gradici e personal pa e reunion ameno y pa e informacion brinda na su persona. 

Despues minister-president Wever-Croes tabata tin un reunion cu representantenan di PWC y tambe tabata tin un encuentro cu presidente di Caft Raymond Gradus. 

Potretnan ta cortesia di Arubahuis