Porfin Brandweer a haya e atencion y inversionnan necesario

Parlamentario Shailiny Tromp-Lee (MEP):

ORANJESTAD (AAN): Durante e conferencia di prensa di gobierno 25 di juli, Minister Rocco Tjon a elabora extensamente riba e trabounan cu a tuma lugar durante e prome aña di gobernacion. Na algun ocasion Parlamentario Shailiny Tromp-Lee a wordo acerca personalmente pa trahadornan di Brandweer cu tabata preocupa of tabata pidi atencion pa cu e situacion di siguridad y material y tambe pa nan asuntonan di personal. Pesey mes e ta contento di tende kico tur a tuma lugar ultimo lunanan. 

Asuntonan di personal y organisacion

Ta di aplaudi cu a percura, hunto cu Departamento di Recurso Humano di Gobierno, pa atende cu tur peticion encuanto promocion cu ainda no a keda finalisa. Gobierno a informa cu na e momentonan aki tur ta na Gobernador y ta anticipa cu pa fin di juli e proceso aki ta keda finalisa y tur trahador di Brandweer lo ricibi un contesta.

Alabes pa cumpli cu e proceso di desaroyo y crecemento profesional interno den Brandweer Gobierno a inicia caba cu e opleiding pa Manschap B y comienso di otro luna lo start cu e opleiding pa Bevelvoerder. Algo cu tabata sigur necesario. Ta bon pa menciona tambe cu algun reconocimento a tuma lugar caminda a duna elogio na trabou y dedicacion di diferente bombero. Un actividad cu e ta aplaudi y sostene. Sigur tur e desaroyonan riba e tereno di personal y organisacion lo beneficia e organisacion den su totalidad y tambe lo tin su impacto riba e motivacion y sentimento di balorisacion di e trahadornan. 

Inversionnan

Otro aspecto cu sigur a haya hopi atencion ta e parti di material, wagenpark y uniform. Esakinan sigur tabata necesario pa por garantisa siguridad di e trahadornan y na mes momento ta sumamente necesario pa Brandweer por cumpli debidamente cu su trabou.

Material y Uniform

Brandweer a ricibi of ta ricibiendo diferente material y uniform. Gobierno a caba di anuncia cu e bluspakken nobo a yega y trahadornan a haya laars, handschoen y helm nobo. Tambe a busca perslucht/ademlichtapparatuur nobo pa e bomberonan. E bluspakken bieu tabata inversion haci na 2005 y algun di 2018 y e perslucht ta trata inversion di 1997 y 2003. E informacion aki so caba ta indica e necesidad di materialnan nobo y cu un biaha mas por tuma nota cu bou di gobernacion di AVP, durante 2009-2017, ningun di e inversionnan necesario e importante aki no a tuma lugar. Pa loke ta trata e materialnan nobo, ta bon pa menciona cu ya e cursonan necesario ta tumando lugar door di e companianan for di cual a cumpra e materialnan pa percura pa nos bomberonan sa con pa traha cu tur e materialnan nobo. Banda di e materialnan aki Brandweer ta hayando  uniform completamente nobo dentro di poco.

Trucknan

Pa loke ta trata nan wagenpark nan a haya of ta hayando e aña aki ainda 2 truck Tankwagen, 2 truck Auto spuit y 1 crash truck nobo. Un inversion cu tabata sumamente necesario, urgente y caminda Gobierno a aproba 2.2 miyon florin pa por finalisa e compra di e 6 trucknan aki. E trucknan actual ta cende cu pifpaf, awa ta drenta den e truck ora di awacero, e handrem no ta funciona y asina por sigui menciona. Ta mas cu bisto cu e inversion aki tabata uno urgente y necesario y di e forma aki sigur por sigui garantisa e trabounan asina importante cu Brandweer ta haci pa entre otro nos Airport y pa henter nos comunidad. Asina ta percura cu nan por deal cu cualkier calamidad cu por presenta.

Infrastructura

Por ultimo a percura pa e renobacion di e post na San Nicolas. Un renobacion cu tabata na su lugar y cu Gobierno a pone como un prioridad. Tambe a percura pa renoba e alarmcentrale di Brandweer completamente.

Pa temina Parlamentario Shailiny Tromp-Lee a subraya cu tur e inversionnan aki, Brandweer a boga hopi tempo pa nan y awor nan a bira un realidad. Mi kier felicita henter Cuerpo di Bombero cu porfin a haya e atencion y e inversion tan necesario aki. Tambe mi ta felicita Gabinete Wever-Croes, principalmente Minister Rocco Tjon cu a scucha Cuerpo di Bombero, a haci nan un prioridad y asina a logra haci esaki tur e inversionnan aki posibel.