Prome Minister Eman ta mira expansion di Aeropuerto lo pusha nos pa yega un otro nivel

Cu confiansa den un futuro di innovacion, conectividad y crecemento economico sostenibel

ORANJESTAD (AAN): Continuando cu e actualisacion mas profundo di tur trabou andando na Pais Aruba, e siman pasa Prome Minister mr. Mike Eman hunto cu Minister di Turismo, Transporte y Labor mr. Wendrick Cicilia a ricibi un presentacion oficial di e terminal nobo na Aeropuerto Internacional Reina Beatrix.

   Esaki ta forma parti di e proyecto Gateway 2030 cu Gabinete Eman II a anuncia bek na mei 2017, den preparacion pa e crecemento turistico. Tabata un gran satisfaccion pa e mandatario mira con e proyecto ta avansando cu e culminacion di Fase 1A. E ta un paso firme pa mehora e infrastructura aereo y optimalisa e experiencia di e pasahero. Na mesun momento ta promove crecemento economico y fortalece Aruba como lider regional den aviacion.

   Durante e presentacion, ehecutivonan di Aruba Airport Authority N.V. a enfatisa riba e caracteristica innovado di e terminal unda a duna un recorido na Prome Minister cu splicacion di e sistema ultra moderno pa maneho di maleta, diseña pa elimina ineficiencia y amplia comodidad di pasahero. Prome Minister ta sumamente impresiona cu e resultado. E check-in terminal ta completamente automatisa y eficiente pa ricibi e turista despues di a pasa su vakantie na Aruba. E sistema di "baggage handling" ultra moderno ta procesa y scan e maletanan di forma completamente automatisa. Esaki ta un contribucion grandi pa fortalece Aruba su posicion den Caribe.

  Durante e bishita na e facilidad, Prome Minister a recorda con su ruman homber Henny Eman (dfm), como Prome Minister di Aruba y como visionario pa desaroyo di nos turismo, a negocia cu Merca pa trece Pre-Clearance Aruba. Esaki a percura, no solamente pa un servicio lihe, pero tambe a acopla Aruba na e standard halto di pre-clearance segun e standard di Merca.

   “Henny Eman su pensamento riba e balor adicional di pre-clearence a yuda expande nos turismo riba e capacidad y percura pa nos ta lider den e sector turistico den Caribe. E expansion di nos aeropuerto, lo pusha nos pa yega un otro nivel,” asina Premier Eman a expresa reafirmando cu e desaroyo aki ta un testimonio di e capacidad di Aruba pa implementa politica visionario cu ta beneficia nos pais.

  Aruba ta tuma e pasonan necesario pa keda competitivo den e industria global aereo, mientras ta mehora eficiencia y sostenibilidad. Esaki no solamente ta modernisa nos aeropuerto; pero ta posiciona Aruba pa un exito economico y ta garantisa un experiencia optimal pa nos pasaheronan. Cu e logro significativo aki, Aruba ta move cu confiansa den un futuro di innovacion, conectividad y crecemento economico sostenibel.