E ley pa proteha e naturaleza tin un balor ecologico of un balor pa Aruba mes

Director di DNM Gisbert Boekhoudt:

*E mangelnan ta parti di e ley aki y no mag daña nan 

ORANJESTAD (AAN)—Den entrevista cu DIARIO, director di DNM (Departamento di Naturaleza y Medio Ambiente) señor Gisbert Boekhoudt, a splica cu Ley ta proteha e naturaleza cu tin un balor ecologico, of cu tin balor pa Aruba mes.

“Nos matanan cu ta den peligro di extincion, of cu tin un balor pa naturaleza en general, ta esnan cu ta proteha segun e landsbesluit cu ta regarda flora y fauna. E mangelnan ta parti di e ley ey, cu ta bisa cu bo no mag di daña un mata. E daño ta si un hende ta bay eynan y ta kibra e takinan of corta nan segun nan mesun kier. E ora ey, esey ta considera como daña un mata”, señor Boekhoudt a bisa.

El a agrega cu algun aña pasa DNM a traha un documento pa e contratistanan cu ta percura pa e mantenimento di e tuberia di WEB of e brug nobo, na unda e mangelnan tambe ta parti di e sistema.

“Si bo no cuida un, e otro ta daña; y si bo no cuida e otro e un ta daña. Dus, e ta un relacion cu otro, y specificamente p’esey nos a skirbi pa e tuberia. Pasobra si no e matanan ta crece y ta forza y por haci daño na e tuberia y asina tambe na e brug; si nos no snoei. Snoeimento, en general, ta pa stimula pa e mata genera mas flor, mas fruta of pa e crece na un forma cu pa landscaping ta desea”, Gisbert Boekhoudt a indica.

El a agrega cu snoeimento ta pa percura cu e mata keda bibo pero cu ainda por regenera y despues e por saca su flor, y percura pa otro mata sali for di dje despues.

“Esey ta un di e formanan cu nos tin pa esnan cu ta bay haci e trabao. Nan ta bay hacie di antemano. Un compania cu ta haci mantenimento na brug, nan ta informa y nan mester entrega nan peticion pa Minister duna ontheffing. Eynan tin un procedure, cu nos tin un documento pa cana pa e ontheffing por wordo duna. Pa campamento no tin esey. No tin razon pa un ontheffing durante un campamento; tin diferente otro razonnan, dus ora tin peliger pa transportacion, por ehempel na airport si tin peliger di cierto matanan pa avionnan baha. P’esey aeropuerto no tin palonan grandi, pero tin cierto razonnan pakico si bo por haya un ontheffing”, director di DNM a declara.