Prome Minister Eman a scucha y atende situacion di pensionadonan den comunidad

Accion di Bario:

ORANJESTAD (AAN): Durante Accion di Bario, Prome Minister Mike Eman a haya oportunidad pa sinta y combersa directamente cu varios pensionado tocante nan experiencia diario, nan necesidadnan y e cambionan cu nan ta sinti den nan entrada.

   E encuentronan a brinda un momento importante pa tende directamente di nos adultonan mayor con medidanan social ta impacta nan bida. Un di e pensionadonan a comparti cu, despues di añanan cu un entrada limita, e mehoracion cu a ricibi den su entrada mensual a representa un yudansa importante p’e.

E experiencia personal aki ta conecta cu e paso cu Gobierno a tuma na 2025 pa aumenta e reparatietoeslag pa pensionadonan, un medida cu a beneficia mas di 19.000 pensionado.

   Durante e combersacion, a keda cla tambe cu pa adultonan mayor, gastonan diario manera cuminda y otro necesidadnan basico ta sigui exigi atencion y bon administracion di nan entrada. E pensionadonan a expresa aprecio pa e mehoracionnan cu nan a sinti, mientras cu nan experiencia ta subraya importancia pa Gobierno sigui scucha y mantene contacto directo cu e grupo aki.

   Pa Prome Minister Eman, precisamente e contacto personal ta un parti importante di Accion di Bario. No solamente pa papia tocante maneho, sino pa tende directamente con decisionnan cu Gobierno ta tuma ta yega cerca hende y con nan ta experiencia den practica. E atencion pa pensionadonan ta sigui forma parti di e agenda social di Gobierno.

   E combersacionnan durante Accion di Bario a pone principalmente e experiencia humano como prioridad: adultonan mayor cu por conta nan propio historia, expresa nan aprecio y, na mes momento, comparti directamente unda ainda tin necesidad.

   Accion di Bario ta sigui crea e espacio pa Gobierno acerca comunidad, scucha su hende y tene contacto directo cu e realidad cu nan ta biba tur dia.