Presidente di Aruba Shriners Club, señor Lito Lacle:
ORANJESTAD (AAN): Aruba Shriners Club ta enfoca riba yudansa na muchanan na Aruba cu tin necesidad di tratamento medico specialisa, incluyendo kemadura, hazenlip y protesis.
Den un entrevista cu DIARIO, presidente di Aruba Shriners Club, señor Lito Lacle, a splica cu e club ta forma parti di e organizacion internacional Shriners International, via Araba Shriners na Fort Myers, Florida.
“Nos tarea den esaki ta pa percura pa muchanan cu tin problema cu kemadura, hazenlip, falta un pia of un man, y percura pa nan por haya un protesis,” Lacle a splica.
Segun e presidente, Aruba Shriners Club lo por facilita y coordina e proceso necesario pa muchanan menor di edad viaha pa Merca pa ricibi e atencion necesario.
“Ful e procedura aki nos na Aruba por regla pa un mucha menor di edad por bay Merca, haya un protesis, ricibi tratamento pa kemadura y tambe pa hazenlip,” el a indica.
Lacle a splica cu, despues cu e statuto di e organizacion a keda cla, Aruba Shriners Club a cuminsa inmediatamente cu preparacion pa su prome proyecto. El a destaca tambe e apoyo cu e iniciativa a ricibi for di comunidad profesional na Aruba.
Segun Lacle, varios notario a mustra interes pa yuda cu preparacion di e statuto sin cobra, algo cu, segun e, ta demostra confianza den e meta y trabao di Aruba Shriners Club.
“Pa otro siman Shriners Club lo tin su statuto y lo por haya un cuenta di banco. Esaki lo duna nos e posibilidad pa cuminsa recauda fondo, pa asina nos mes por percura pa e costonan di transporte pa e proyectonan cu ta na caminda,” Lacle a expresa.
Cu establecemento oficial di e club y cu por tin su propio cuenta bancario, Aruba Shriners Club ta prepara pa inicia actividadnan di recaudacion di fondo. E fondonan lo wordo uza principalmente pa cubri gastonan relaciona cu transporte y otro necesidadnan logistico di muchanan cu mester viaha pa ricibi tratamento medico especialisa, entre otro di hazenlip, kemadura y pa haya protesis.
