Prome Minister cu varios reunion importante na Arubahuis

ORANJESTAD (AAN): Durante su bishita na Hulanda, Prome Minister Evelyn Wever-Croes tabata tin varios reunion na Arubahuis pa trata diferente tema di relevancia pa Aruba.

Prome Minister a reuni cu Minister Plenipotenciario señor Ady Thijsen, directora di Arubahuis señora Joselin Croes, y cu e ekipo completo di Arubahuis. 

Reunion cu Minister Plenipotenciario señor Ady Thijsen

            Prome Minister a indica cu den e reunion cu señor Ady Thijsen a trata e tema di e vision cu e Kabinet di e "gevolgmachtigde minister" tin y di tur e contactonan importante cu tin den politiek Den Haag. Tambe a pasa riba e temanan pendiente pa loke ta Union Europeo, mirando cu señor Thijsen banda di su funcion como Minister Plenipotenciario, e ta tambe representante di Union Europeo pa Aruba.

            Prome Minister a splica cu por mira bek riba un periodo hopi intensivo pero cu logronan importante, specialmente pa loke ta trata e confiansa cu mester tin entre Aruba y e Gabinete di "gevolmachtigde minister".

            Otro topico importante ta e presidencia di OCTA cu Aruba tin e ana aki. Prome Minister ta e presidente di e Asociacion di e paisnan cu tin un laso cu Union Europeo, y señor Ady Thijsen ta presidente di e comicion ehecutivo. Y akinan tambe tin varios tema cu mester a wordo adresa. 

Reunion cu Directora di Arubahuis señora Joselin Croes

            Durante su reunion cu e directora di Arubahuis señora Joselin Croes, a toca temanan riba e organisacion en general y e personal di Arubahuis. Prome Minister a indica cu apesar cu e team ta hopi chikito, nan ta logrando hopi cosnan positivo pa Aruba. Gobierno ta consciente cu nan tin e necesidad pa mas personal pero tur esey cu profesionalismo di e organisacion.

            Aparte di e tema di personal y organisacion a toca otro tema importante cu ta di e studiantenan di Aruba na Hulanda. Hunto cu señora Croes, Gobierno ta trahando riba un plan di urgencia pa wak con ta bay yuda e studiantenan na un miho manera. Vivienda ta un reto grandi na Hulanda y p'esey ta importante pa tur studiante cu lo desea di bay Hulanda aplica hopi trempan pa asina logra haya un luga pa biba. E plan di urgencia lo wordo presenta na Conseho di Minister pronto pa asina decisionnan necesario por wordo tuma pa garantisa ayudo na e studiantenan. 

Reunion cu ekipo di Arubahuis

            Prome Minister a indica cu e reunion aki tabata uno hopi positivo y informativo, na unda e tabata tin e oportunidad di duna hopi informacion di tur loke ta andando na Aruba pero tambe scucha di nan con nan ta mira e desaroyonan na Hulanda y con lo por mehora e servicio cu Arubahuis mester duna na Hulanda. Tambe Prome Minister a gradici nan pa tur e cooperacion duna na su persona durante e 7 añanan aki. Tabata tin retonan pero awe por mira bek riba un Arubahuis fuerte, resiliente y cu ta goza di respet y confiansa na Hulanda.

            "E dianan na Hulanda tabata largo y cu hopi reunion, pero pami semper ta un placer di por bishita Arubahuis, cu ta nos cas na Hulanda" Prome Minister a expresa.