Prome Minister a splica kico Relato Anual di Asuntonan General di Aña 2022 ta describi

ORANJESTAD (AAN) – Minister Presidente mr. Evelyn Wever-Croes tabata encarga cu e Conferencia di Prensa di Gobierno, Dialuna ultimo.

Prome Minister a elabora riba e relato anual di Ministerio di Asuntonan General pa aña 2022, United Nations Water Conference cu lo tuma lugar proximamente di 22 pa 24 di Maart, y tambe e 'Prestatie Management System', pa aña 2023. 

RELATO ANUAL 2022:

Premier Wever-Croes a señala cu manera ta custumber, e aña aki tambe su Ministerio a publica un relato anual 2022. Esaki ta algo cu nan a cuminza desde riba dje na aña 2018 cu ta e prome aña di gobernacion completo, y despues 2019, 2020, 2021 y e aña aki, 2022, ta e di cinco relato.

E Relato Anual aki ta describi e trabao di su ministerio. Pues, no di full gobierno sino di su ministerio cu ta esun di Asuntonan General, Innovacion, Organizacion Gubernamental, Infrastructura y Ordenanza Teritorial.

E relato anual aki (Jaarverslag) aworaki ta wordo publica pa prome biaha. Tin un link tambe cu tur hende por download y tuma nota di tur e informacion.

E mandatario a duna un recuento en general di loke gobierno confronta na cuminzamento. 2022 tabata un aña unda Aruba ainda tabata tin e pandemia, e variante di Omicron cu a causa hopi contagio. Sinembargo, despues di esey Aruba a cuminza recupera y den su ministerio nan a logra tambe hopi trabao, apesar di tur cos, y esey ta danki na cada un di e empleadonan cu ta labora den e Departamentonan di e ministerio aki.

Despues, den e prome parti, ta bay riba asuntonan general, cu ta un gran cantidad di trabao cu ta wordo raporta akiden: relacion den Reino ta bay extensamente den dje, Relacionnan Exterior tambe, nan ta duna e relato di e trabaonan; tambe kico e ministerio ta haciendo riba e tereno di desaroyo sostenible, e metanan di SDG’s cu Nacionnan Uni a propone. Nan ta papia tambe di genero; tin un capitulo hopi extenso tocante Seguridad Nacional, y tambe e proyecto di veiligheidshuis cu nan a introduci. Finalmente tambe e tema di calamidad, e diferente crisis cu tabata tin den 2022. Ta cuminza cu e crisis di Covid-19 cu ainda tabata esun cu a domina na comienzo di aña pero no por lubida tambe e problematica humanitario na Venezuela, cu a causa cu na Aruba tambe nos tin e problema di asilo. Finalmente, e capitulo aki ta caba cu Comunicacion y e diferente Comisionnan cu Ministerio di Asuntonan General ta atende.

E dignatario a splica cu un parafo hopi interesante cu semper e ta inclui, ta e gastonan di su ministerio y compare cu e minister presidente cu tabata prome cune.

“Na 2022, nos por mira cu nos a cera aña cu un total di 23 persona trahando na nos ministerio, compara cu 147 cu e minister presidente prome cu mi, tabata tin. Esaki ta un diferencia di 124 y na placa ta un diferencia di 9 miyon florin entre e dos ministerionan, tempo cu señor Eman, ainda tabata prome minister y ami cu awo ta prome minister pa cinco aña. Y tur e cinco añanan aki nos a spaar nuebe miyon door cu nos a baha gastonan. Y bo por weita cu simplemente door di cambia e prome minister di e pais aki a spaar pa e pais aki 45 miyon te cu aworaki. Esey ta un dato hopi relevante”, Minister Presidente Evelyn Wever Croes a remarca, y ta recomenda tur hende lesa esaki na pagina 31 pa wak e cifranan y con hopi menos gasto su ministerio tin compara cu e minister presidente prome cune.