DIARIO ta na haltura di kico e ta papia ora papia di Hospital
*E acusacionnan di SOGA awe contra prensa ta inaceptabel
*Mike Eman cu hospital di oro y un protocol dialogo social AZV
ORANJESTAD(AAN)—Ta cu hopi asombro nos mester a tuma nota di e acusacion di SOGA pa loke ta trata desaroyonan na Hospital y den cual e trabou periodistico ta wordo cuestiona.
Democracia ta exigi pa tur instancia por expresa nan mes y den edicionnan di DIARIO y tambe otro medionan di comunicacion di Aruba por a mira tur instancia a haya oportunidad pa presenta nan punto.
Segun leynan democratico, tur hende tin derecho di expresa nan mes tur momento pero e medio di comunicacion no tin deber di bay pidi tur hende expresa nan mes cada momento cu nan kier papia riba un topico den cual tin mas cu un persona of instancia cu un lugar importante.
Nos ta para tras di loke nos a trece dilanti a base di conocemento y investigacionnan cu ta exigi conocemento mas grandi cu solamente basico, pa por informa Pueblo di Aruba.
Pa nos ta sumamente franco cu SOGA, mester cuminsa na bisa cu SOGA no ta un instancia priva di un grupo priva, pero un fundacion di Pueblo di Aruba cu debe splicacion na henter Pueblo di Aruba sigur na momento cu salud publico di Aruba atrobe ta tembla.
Awe no mester busca culpabilidad cerca periodismo, cu mester haci uzo di su capacidad y conocemento internacional y local pa e por haci su trabou.
Pa bay directamente al grano, ban cuminsa cu e inicio di e proyecto pa renoba Hospital di Aruba y e situacion den cual Aruba y sigur e sector di cuido di Aruba tabata financieramente na 2014 ora e proyecto a wordo inicia.
Pa nos por bolbe den tempo, bay na raiz di e proyecto, busca cifranan y tur informacion necesario, nos mester sa di kico nos ta papia.
Tur loke DIARIO a trece dilanti te awor ta basa riba conocemento di e tereno, cu ta decisivo pa salud y bida di hende, cu ta centro di mundo y di tur esfuerzo.
Ora bolbe na 2014, ta topa cu un Gobierno Mike Eman cu a introduci un proyecto Hospital carisimo na un Pueblo cu un populacion limita cu ademas ta depende riba tereno di cuido medico di un Seguro General Obligatorio.
Pa papia di hasta compra di un par di zapato, mester tin un feasibility study cu ta mustra si tin placa hasta pa cumpra producto pa haci e zapato limpi.
Ora ta traha un hospital mester tin estudionan cu ta evita loke a pasa na Aruba, caminda na 2014 a construi un “hospital di cinco strea” na momento cu mester atende tambe cu un Protocol Dialogo Social AZV, cu atrobe tabata tin problema serio di salud financiero.
Ta pa medio di AZV Pueblo di Aruba ta paga e hospital. Con por traha un Hospital di cinco strea na momento cu mester a introduci un “bestemmingsbelasting” di 1 porciento pa tene AZV na bida?
Kico ta wordo yama un Hospital di cinco strea?
Principio di un Hospital ta, cu e ta sirbi un comunidad na e momentonan mas dificil. Un Hospital no por bira un calamidad, loke el a bira pa e trahador cu tin tur su derecho pa reclama e ambiente den cual e mester a traha.
Si acudi na cualkier compania cu ta conseha riba proyectonan di Salud Publico, sigur nan lo puntra nan mes, con por a impone situacionnan manera a impone riba Pueblo di Aruba.
Wega politico a hunga un papel barata den un proyecto crucial pa un comunidad y den esaki nos no ta papia di miembronan di ningun fundacion pero e forma cu segun nos sistema democratico, mundo politico mester percura pa e unico hospital di un pais por funciona.
Trabou di DIARIO no ta pa construi hospital ni pa percura pa AZV funciona ni pa percura pa un maneho medico.
Trabou di DIARIO ta pa nos tin e base suficiente di conocemento local y internacional y aceso na tur informacion experto cu ta haci posibel pa nos sirbi como polis di democracia, cu mester por defende na prome lugar e bienestar di hende cu tabata directamente na peliger, no solamente pa clientenan pero tambe pa personal, pa profesionalnan cu mester a lucha pa nan derecho manera documentonan ta proba.
Ta na DIARIO pa investiga riba tur tereno y na tur instancia cu ta traha na nomber di Pueblo, pa responsabilisa nan mes enfrente Pueblo y no keda en espera di un invitacion di ningun medio di comunicacion.
