Prome Minister a reuni cu Secretario di Estado Zsolt Szabó riba e negociacionnan entre Aruba y Hulanda

ORANJESTAD (AAN):  Durante su bishita di trabou na Hulanda, Prome Minister Evelyn Wever-Croes a reuni cu Secretario di Estado Zsolt Szabó riba varios tema importante,

incluyendo e negociacionnan cu tin andando entre Aruba y Hulanda riba e debe di Covid. 

Negociacionnan entre Aruba y Hulanda

            Prome Minister a splica cu e negociacionnan aki a cuminsa na Juni 2024 despues di a cera un acuerdo e tempo ey cu Secretario di Estado Alexandra van Huffelen. Den e acuerdo aki a palabra cu e interes di 6.9% cu Aruba tabata paga riba e debe di covid ta baha na 5.1% bou di e condicion cu lo traha na ancra e supervision financiero mas firmemente. Cu esaki Hulanda kier sigura cu Aruba lo paga bek e 916 miyon florin cu a wordo fia durante e temporada di covid.

            Na e momento aki e supervision financiero ta den un ley local, un “landsverordening” pero e no ta bon regla. E normanan ta anticua y no tin un manera facil pa por sali di esaki. Pa e motibo aki, mirando cu e negociacionnan ta andando, Gobierno a probecha pa traha un ley mas den beneficio di pais Aruba. Si logra esaki, e interes por baha te na 3.4%, y lo bin tambe un miho “exit clausule”, un manera mas facil di por sali di e rijkswet pa asina Aruba por haya bek su autonomia financiero. 

Puntonan di deliberacion

            Un di e puntonan di deliberacion ta un palabracion cu Hulanda cu lo bin un ley di Reino cu ta e “rijkswet”, y un ley local “landsverordening”. Den e ley di Reino ta bay ancra e definicionnan, kico ta un norma financiero, un norma di presupuesto, of kico ta un norma di debe. Den e ley local ta bay hancra e porcentahe, por ehempel si e surplus mester ta 1%, esey lo bay den e ley local cu Parlamento ta stipula.

            Un otro palabracion ta cu lo bay bin un bon “exit clausule”. E clausule aki lo indica cu si Aruba cumpli cu un of mas di e condicionnan, e ora lo por automaticamente sali for di e ley di Reino.  Esaki no tin na e momentonan aki, ni den e Raft cu tabata tin riba mesa. P’esey ta importante pa hancra esaki den e ley di Reino. Unabes cu logra sali di e ley di Reino, Aruba lo haya su autonomia financiero bek.

            Ta importante si pa enfatisa cu Aruba lo mester hiba un maneho financiero debido, saludabel, y responsabel. Tambe mester cumpli cu e normanan y mester tin supervision financiero, sino ta CAft ta un otro, y esaki ta loke nos ta yama nos “begrotingskamer”. Tambe a wordo palabra cu Hulanda lo refinancia e debenan bieu di Aruba na 3.4%.

            “Na e momentonan aki, mayoria di e puntonan aki ya tin un acuerdo riba nan. Lo unico cu falta ta kico ta e normanan financiero cu Aruba lo bay adopta, y esaki Gobierno ta trahando riba dje hunto cu IMF. Negociacionnan ta bayendo bon, Hulanda tambe ta satisfecho cu e manera con tur cos ta canando. Y mi tin fe y confiansa cu nos lo sali afor den e miho interes di Aruba,” Prome Minister a expresa.