ORANJESTAD (AAN): Organicacion Panamericano di Salud (Pan American Health Organization),
esta PAHO a emiti un alerta epidemiologico riba e aumento di riesgo di brote di dengue den e region di America, relaciona cu e expansion di e serotipo DENV-3 na varios pais den e area.
PAHO ta pidi e painan pa fortalece nan sistema di vigilancia, diagnostico tempran y maneho clinico pa enfrenta un posibel aumento di caso di dengue.
Dengue ta un malesa viral transmiti pa e muskita Aedes aegypti y e tin cuater serotipo: DENV-1, DENV-2, DENV-3 y DENV-4. Inmunidad contra un serotipo ta duna proteccion vitalicio so contra esun mesun serotipo, lo ke ta nifica cu infeccion posterior cu otro serotipo por aumenta e riesgo di forma severo di e malesa.
E aparicion of aumento di un serotipo cu no tabata predominante den un area antes por trece un expansion di caso pa motibo di falta di inmunidad den e populacion.
Situacion di DENV-3 den e region
E serotipo DENV-3 a ser identifica den varios paisnan di America, incluyendo Brasil, Colombia, Costa Rica, Guatemala, Mexico y Peru. Na 2024, Argentina a reporta su presencia, indicando e introduccion di e serotipo na e pais. Mesun aña ey, Brasil y Colombia a reporta un aumento di caso relaciona cu DENV-3, principalmente entre mucha, y e virus tambe a keda detecta den otro pais di America Central y Caribe.
E serotipo aki ta conoci pa cousa forma severo di dengue, incluso den infeccion primario, loke ta preocupante pa salubridad publico.
E presencia di DENV-3 despues di un ausencia largo den cierto area ta aumenta e vulnerabilidad di e populacion cu no tabata den exposicion anteriormente na esaki.
Situacion actual y medidanan recomenda
Den 2024, e region di America a reporta mas di 13 miyon caso di dengue, cu 22,684 caso grabe (0.17% di total) y 8,186 fayecidonan (tasa di mortalidad di 0.063%).
Den e prome simannan di 2025, 23 pais y teritorio den e region a reporta un total di 238,659 caso, cu e mayoria den Brasil (87%), sigui pa Colombia (5.6%), Nicaragua (2.5%), Peru (2.5%) y Mexico (2.5%). Di esaki, 263 caso tabata severo, y 23 hende a fayece pa motibo di e malesa.
PAHO ta recomenda cu e paisnan fortalece nan medida di control di e vector, amplia e capacidad di diagnostico den e sistema di salu, y garantisa un tratamento tempran y adecua pa preveni complicacion severo.
Campañanan educativo publico pa reduci exposicion na e muskitanan y elimina nan luga di crecemento tambe ta esencial.
Papel di vacunacion y monitoreo
Tocante vacunacion, segun e evidencia publica den e estudio principal di fase 3, e vacuna TAK-003, cu ta wordo uza den cierto paisnan den e region, a mustra un proteccion mas abao contra DENV-3, specialmente den mucha cu no tabata infecta anteriormente. Esaki ta enfatisa e necesidad di garantisa un vacunacion y mantene un monitoreo continuo riba efectonan adverso cu por ta relaciona cu vacunacion.
PAHO ta sigui monitorea e evolucion di e circulacion di DENV-3 hunto cu e otro serotipo, y lo sigui duna sosten pa paisnan den implementacion di medida efectivo pa controla y responde na posibel brotenan. Ta esencial cu e sistema di salud ta prepara pa maneha e aumento di caso cu ta spera y mitiga e riesgo di complicacion severo relaciona cu e malesa aki.
