Prome Minister a reuni cu Premier Rutte y sosten di likides tawata un tema di prioridad den e reunion

Durante Asamblea General di Nacionnan Uni na New York:

ORANJESTAD (AAN): Hunto cu Premier di Hulanda, Mark Rutte, Prome Minister Evelyn Wever-Croes ta na New York pa atende e Asamblea General di Nacionnan Uni, UNGA 2021.

            E prome reunion di Premier Wever-croes tabata cu Premier Mark Rutte

na Vertegenwoordigincondig di Reino Hulandes na New York. Den e reunion aki a toca varios tema, entre otro a elabora riba e gobierno nobo na Aruba, di e coalicion y con e reparticion a bay y e trabaonan cu a tuma luga den cuadro di e screening .

            “Premier Rutte a felicita mi tambe cu e gobierno nobo y desea mi hopi exito”, Prome Minister a expresa.

            E Premiernan a hiba combersacion amplio tambe riba e situacion di Covid. Premier Rutte tabata hopi interesa pa sa con Aruba ta manehando e situacion. Prome Minister a comparti e bon noticianan cu Aruba ta dominando e ola aki y di e variante Delta tambe. Tambe a menciona e maneranan con Hulanda por yuda Aruba den esaki.

            Un otro tema cu a wordo treci dilanti ta e tema di sosten di likides y e reunion di Conseho di Minister di Reino cu a tuma luga diabierna  mainta y e condicionnan pa cu esaki. Prome Minister a duna di conoce cu aki e Premiernan a yega na cierto palabracionnan tambe pa sigui bay padilanti.

            “Con cu bay bin, Aruba ta keda depende di e sosten di Hulanda den esaki tambe”.

            Prome Minister a duna di conoce cu varios otro tema cu tawata riba agenda a wordo trata. Esakinan ta temanan cu e Premiernan ta atendiendo hunto durante e Asamblea na New York entre nan e reunionnan cu Secretario General di Nacionnan Uni y tambe e reunion di Asamblea General mes.