Abogado mr. Carlo a apela --- ORANJESTAD (AAN): E noticia cu Fiscal a ordena pa Rudy Carti entrega su mes na KIA, a haya hopi reaccion.
DIARIO ayera a papia cu abogado mr. Carlo, kende ta representa Rudy Carti. E abogado a duna di conoce cu el a apela contra e decision di Fiscal, pasobra e ta haya inhusto cu KIA a laga Rudy Carti liber, teniendo cuenta cu e sentencia di Hues y awor e Fiscal ta bin cu e decision aki.
E abogado a splica cu tambe el a pidi pa suspende e detencion y si tog ta haya cu loke Fiscal a haci ta corecto, pa laga Rudy Carti den libertad te ora cu e caso di apelacion keda trata den Corte Superior.
Sin duda, e hecho cu Rudy Carti a wordo yama pa entrega su mes na KIA sino e lo wordo deteni, ta un shock pa Rudy Carti. Esaki ta wordo considera manera un tortura mental, mirando cu apenas e tabatin 12 dia den libertad.
HOF TA TRATA APELACION
DIARIO por a compronde cu otro siman Diaranzon, Hof di Curacao lo trata e apelacion y e otro peticionnan via video conference. Posiblemente Rudy Carti lo mester wordo hiba Corte di Husticia pa ta presente ora di tratamento, caminda 3 Hues lo bay atende e caso.
Ta asina cu dia 8 di October 2021, Hues di Corte den Promer Instancia a declara Rudy Carti liber di 4 di e 8 acusacionnan di lo a mishi y penetra dama cu e lo a duna masashi. Hues a condena Rudy Carti na 2 aña di prison di cual 1 aña ta condicional cu un tempo di prueba di 2 aña.
Hues a ordena pa Rudy keda sin traha como fisioterapista pa 4 aña. E hecho cu Rudy Carti tabatin 8 luna caba sera, kitando 1/3 parti di e 1 aña cu e mester sinta, ta net loke el a sinta den KIA. Ta pesey el a wordo laga liber. Fiscal no a gusta cu Rudy Carti a wordo laga liber y a duna orden cu e mester entrega su mes na KIA pendiente e caso di apelacion.
Otro siman, tres Hues (Hof) lo bay atende e asunto aki pa determina si Rudy Carti mester wordo laga liber of si e mester keda den KIA.
