Meta principal di “Nos grandinan activo” na Kibrahacha ta pa brinda extra servicio y di calidad

Juni Faro, director IBiSA:

ORANJESTAD (AAN) – Juni Faro, director di IBiSA, den entrevista cu DIARIO tambe a referi na e proyecto “Nos grandinan activo” cu cual ta coopera awo cu Club Kibrahacha tambe.

E meta principal di e colaboracion aki ta pa brinda servicio extra y di calidad pa nos grandinan, na Kibrahacha. Asina señor Faro a expresa.

E grupo aki ta merece hopi atencion. El a reitera cu e proyecto “Nos grandinan activo” ta tumando lugar pa varios aña na IBiSA San Nicolas y na Simeon Antonio, unda nan ta atrae hende grandi pa haci actividad fisico.

“Pa nos e proceso no a bay sin reto, manera ta conoci IBiSA su calender ta yena yena cu actividad for di Januari te cu December, pero asina mes, nos a haci tur intento pa acopla Kibrahacha tambe, pa nos haya un proyecto akinan”, Juni Faro a relata.

Cu boluntad y dedicacion nan ta eynan y e ta sinti su mes hopi contento, pasobra hopi aña pasa tabata tin un otro forma di colaboracion cu Club Kibrahacha, pero den forma di musica, pa alegra hende. Aworaki, e cu su amigo Matos ta sinta hunto atrobe, den otro stage, pa otro colaboracion pa nos grandinan. “P’esey mi a contento di anuncia esaki, y mi ta gradici Club Kibrahacha pa kere den IBiSA pa por a haci e proyecto aki hunto cu ne”, Juni Faro, director di IBiSA a subraya.