Prome Minister a pasa un rato ameno cu nos grandinan

Den cuadro di Dia di Betico

ORANJESTAD (AAN): Diahuebs mainta Prome Minister Evelyn Wever-Croes a haci un bishita na St Michael Paviljoen pa asina den cuadro di dia di Betico pasa un rato ameno cu nos grandinan.

   Durante e mainta aki Biblioteca Nacional den persona di señora Glenda Savala a tene un bunita charla cu musica y contando e storia di nos Libertador Betico Croes. Sigur un mainta yena di alegria pa nos grandinan cu a goza masha di e presentacion.

   Prome Minister e expresa cu e mainta aki tabata uno hopi bunita, na unda su persona por a comparti hopi di e historia di Betico cu nan. Hopi di nan conoce e storia bon mirando cu nan a biba e temporada cu Betico a lucha pa Aruba yega na su Status Aparte, y p'esey por a comparti hopi storia di con nan conoce y tur loke nan a biba e temporada ey cun'e.

   "Pa mi semper ta un honor pa bishita nos dushi grandinan y gradici nan pa tur loke nan a haci pa nos dushi isla. Ta nan ta esnan cu a construi e pais aki, cu awe nos tin provilegio di biba riba dj'e. E fecha di Dia di Betico ta uno hopi special paso e ta uni hopi hende na Aruba. esey tabata su forsa, y nos ta sigui cu su legado" Prome Minister a expresa