Aruba su legendario musico Joy Kock a fayece

Haya sa mas di su biografia

ORANJESTAD (AAN): Siman pasa Diaranson a drenta e informacion tristo, cu e legendario musico di Aruba kende a ocupa un puesto importante pa proteha y promove musiconan di e isla, a fayece.  Ta trata aki di Jesus Maria Jose Kock, mihor conoci cerca tur hende como ‘Joy’.

   Joy a nace dia 2 December 1938 den e bario di Watertoren na Playa. Scolnan cu Joy a bishita ta St. Dominicus College, despues La Salle College, y Aruba Avond Mavo.

   Joy ta casa cu Señora Blanca Alcida Kock-Fingal y hunto nan tin dos yiu homber.

   Joy a cuminza traha na British American Life Insurance como agente di benta, despues el a bay traha den gobierno den Departamento di Administracion di Huis van Bewaring y despues di 13 aña el a worde traslada pa Instituto di Cultura di Aruba caminda el a traha te na aña 1995. Despues di esey Joy a cuminza cu su propio Agencia di viahe Arutravel y despues a bay disfruta di su pensioen.

   For di su 12 aña di edad, Joy su inspiracion a bini for di e Frerenan di La Salle College  y a cuminza experimenta cu clarinet, saxophone soprano, alto y tenor y dwarsfluit. El a haya les di e Frerenan caminda el a siña lesa musica tambe. Un amigo di dje Alex Odor (q.e.p.d) a influence pa toca saxophone caminda nan a yega di toca hunto na hotel pa hopi aña.

   Joy a yega di traha diferente composicionnan e.o. “Nos Nacion” canta pa Glenda Raghunath na aña 2005. E cantica aki ta papia di e musico, pöeta, pintor, escultor, bailado y declamadornan cu a contribui pa Aruba yega na su Status Aparte. Y e cancion a sali na di dos lugar den e festival “Un canto pa Aruba” e aña ey.

   Otro composicionnan ta “Cantante canta” cu a bira himo di “Voz y Landa Escolar”, “Mi amigo Padu” na occasion di e di 80 aña di Padu Lampe,  y “Alegria di un mucha”. El a compone diferente cantica mas festivalnan di t uma pa mucha. Joy tabata traha letra y melodia, mientras otro hende tabata traha e areglo musical.

   Joy a funciona e como Presidente pa varios organizacion. Entre otro e tabata Presidente di ADAYMA. Joy a fungi como president pa mas o menos 8 aña. Despues ADAYMA a bira e famoso asociacion di musico cu yama ASOMA. Den ASOMA Joy a fungi como president pa 20 aña.

   Joy a fungi tambe como President di Comision pa e.o  Voz Hubenil,  Promocion Cultura Arubano, FDEC, y tabata miembro OTI, e Organizacion de la Television Ibero Americano) caminda Aruba a yega di gana 8 biaha e festival di OTI Antiyas Hulandes pa bay participa na e festival OTI Internacional.

Joy a toca pa casi 30 aña tur anochi den hotel. Entre otro den Sheraton Hotel, Caribbean Hotel, Holiday Inn, Hotel Americana y Hotel Concorde.

   Pa Joy tabata un momento memorable y honorable, ora cu el a dirigi e Orquesta Nacional, inaugurando nos Himno y Bandera na aña 1976.

   Joy a yega di forma parti di diferente  banda musical  y algun di nan como director y manager, e.o. Los Duques del Caribe, Los principles, Oruba Sextet, Poder Latino of Latin Power, Latin Soul, La Nueva Fuerza, Orquesta Nacional, Hotel All Stars Brassband. E tabata hopi activo tanto na Aruba como tambe den exterior caminda el a yega di toca na Curacao, Bonaire, Venezuela, Colombia y Miami.

   Joy tabata hopi active tambe den deporte y tabata hunga futbol y baseball den barrio. Despues el a bay hunga pa Frerenan di La Salle tanto futbol como baseball. Cu tempo el a drenta den Aruba Jrs. Joy tin diploma tambe di scuba diver esta P.A.D.I. Como veterano Joy a hunga pa Aruba Jrs.

   Joy a ricibi e reconocimiento pa Ridder in de Orde van Oranje Nassau. Na cas di Joy tin un variacion enorme di premio y reconocimiento cu Joy a recoge durante su trayectorio como musico, compositor y president di diferente organizacion.  DIARIO tabata publica na numeroso ocasion e opinionnan di Joy relaciona cu musica.  E tabata hopi bon amigo di director Jossy Mansur.

   Ultimo añanan el a bira malo y a distancia su mes for di tur actividadnan cu e tabata aden. Dos siman pasa el a drenta hospital y a fayece dia 22 di Januari 2025.

   E mensahe cu Joy kier laga atras ta “Aruba ta hopi rico den talent musical y nos mester comparti esey cu mundo”. Joy ta bay haya un bunita entiero musical caminda varios musico lo duna un honor musical durante e entiero.

   DIARIO ta manda palabranan di condolencia na henter famia, amigo, y conocirnan. Cu Joy sosega na paz.