Prome Minister a gradici tur cu a contribui y a participa na e prome Caribbean Climate Energy Conference

ORANJESTAD  (AAN):  Diabierna mainta a tuma lugar e ultimo presentacionnan pa loke ta e Caribbean Climate Energy Conference 2023 (CCEC2023).

Na final di e conferencia, den un conferencia di prensa hunto cu Minister di Energia y Clima di Hulanda  Rob Jetten, Prome Minister Evelyn Wever-Croes a duna su discurso final gradiciendo tur e paisnan y institucionnan den Caribe, America Central, Europa y Pacifico pa nan presencia.

            Prome Minister a indica cu durante e ultimo dianan tabata tin varios discucion riba e impacto di cambio di clima riba e paisnan chikito. Tambe a papia di e diferente maneranan cu lo por maneha e cambio di clima y con pa busca solucionnan den miho interes di e comunidad y nacionnan.

            “Manera ta conoci, transicion energetico ta un necesidad pa por reduci e dependencia riba "fossil fuel", teniendo na cuenta kico e transicion aki ta nifica pa e comunidad, e recibonan di coriente y e mercado laboral”. No solamente mester pone atencion riba energia sostenible sino tambe riba energia pagable dirigiendo tur programa di energia renobabel na no solamente baha, sino stabiliza e prijs di energia, Prome Minister a splica,

            Tambe, Wever Croes a trece dilanti splica cu Aruba como pais chikito ta sumamente vulnerable na e menasanan di cambio di clima. Pesey ta importante pa mehora e infrastructura y/of pa busca solucionnan basa riba naturaleza.  Pa por acelera e proceso di transicion energetico y construi resiliencia climatico, lo mester di sumanan grandi pa inverti, pero por a nota durante e conferencia aki y otro foronan, cu tin bareranan pa loke ta trata financiamento climatico global, specialmente pa e islanan chikito.

            Pa conclui, Prome Minister a indica cu colaboracion riba nivel regional, pa loke ta cambio di clima ta esencial. Ta importante pa colabora y intercambia practicanan cu lo ta exitoso, y pa uni forsa y construi un alianza regional pa asina nos voz wordo scucha riba nivel global.

            "Den nomber di Gobierno di Aruba y como pais anfitrion di e conferencia aki, mi kier gradici tur e participantenan pa tuma nan tempo pa bin atende e conferencia importante aki”.

Mi ta spera cu boso estadia aki tabata uno placentero y di pronto por mira cada un di boso bek akinan. Mi ta gradici e Gobierno di Hulanda pa tur e cooperacion pa cu organisacion di e conferencia aki. Tambe un danki special na Minister di Energia y Clima di Hulanda, señor Rob Jetten cu tabata e "co-host" di e conferencia. Bo entusiasmo y boluntad pa apoya e islanan chikito ta di aprecia. Di awor caba mi ta entusiasma pa e siguiente CCEC2023 sperando di mira progreso real riba tur loke a wordo discuti durante e conferencia, Prome Minister a expresa.