Caso Avestruz ta mishi directamente cu asuntonan elemental di democracia - *Un empresa priva lo a sigui paga un trahador cu no por cumpli cu trabou? - *Decision di Gobernador a duna prueba cu Benny mester a retira di Parlamento
ORANJESTAD(AAN)—Pa tur mama, nan yiu ta esun di mas bunita. Hende como hende tin un problema pa acepta cu un persona stima, por a haci algo cu no ta cuadra cu Ley.
Pa tur famia ta dificil ora un tata ta wordo persigui pa Ley, cu ta pa uno y tur.
Durante ultimo simannan nos a sigui tur loke ta pasa rond di e detencion di Benny Sevinger. Loke a bini mas na bista tabata, cu Aruba tabata relativamente trankil mientras otro sospechosonan tabata wordo deteni, tabata keda encarcela y no por a hiba un bida normal pasobra nan ta parti di un investigacion di autoridad di e pais.
E otro sospechosonan di cual varios a keda basta tempo den detencion preventivo, ta directamente mara na un acusacion den cual Benny Sevinger ta central y cu autoridad ta considera cu Benny Sevinger ta e sospechoso principal pasobra ta Benny Sevinger tabata encarga na nomber di Pueblo di Aruba cu tereno di Aruba.
Pues di e otro sospechosonan di berdad tabata culpabel di loke a haci nan sospechoso, Benny tambe mester ta sospechoso. Es mas, ta Benny Sevinger ta uni tur e sospechosonan na otro pasobra ta Benny Sevinger ta e unico cu por permiti algo bay robes den e asunto di tereno, cu mester a keda hopi scondi den seno di Gabinete Mike Eman.
Si autoridad no actua den e caso aki manera nan lo a actua den tur caso, nan lo a trapa riba e pensamento di Ley pa Uno y Ley ta Tur, cu ta base di nos sistema di husticia cu no conoce rango ni posicion ora e mester atende cu un caso, cu Benny Sevinger tabata conciente cu a wordo inicia cu su persona como sospechoso.
AVP cu tur tipo di excusa a duna prueba cu e no ta hala atras. Increibel e forma cu a uza politica pa crea un situacion preferencial, den cual ta trapa riba e moral di e Arubiano, cu ta base di nos leynan.
Nos sistema penal ta basa riba persecucion di loke e mentilidad y e moral di Aruba ta considera como bon y malo.
Nos sistema penal ta basa riba loke Pueblo di Aruba ta considera decente y indecente.
Un Arubiano decente no ta aproba crimen y ta respeta ley cu ta investiga si un crimen a wordo comete.
Ministerio Publico a actua sin mas? Cuanto tempo investigacion a tuma? Tur envolvi no tabata sa cu nan ta sospechoso?
Pueblo di Aruba mester a tolera Benny Sevinger den Prison?
Si pa AVP moral ni decencia ta conta y hasta bofon ta wordo haci publicamente dor di exponentenan halto di AVP contra otro partido cu a pidi pa Benny Sevinger no huramente, Gobernador di Aruba a papia un palabra cla.
Con Benny por a traha pa Parlamento mientras e tabata den prison? Kico lo a pasa si Benny tabata traha pa un empresa priva? Nan lo no a schors su persona pasobra e no por cumpli cu su trabou dor di prison?
Pakico Benny Sevinger si a sigui cobra placa di Pueblo di Aruba mientras e tabata sospechoso y sigur ora el a wordo detene y no por a traha den Parlamento?
Acaso ta malo e tabata cu e no por a presenta na trabou?
Un situacion hopi serio a surgi a base di e forma cu AVP, cu ta yama su mes un Partido Cristian Democrata, a kere cu e por bin impresiona Aruba cu ley cu manera a keda proba awor, e no conoce.
DIARIO lo sigui amplia riba e asunto aki sigur awor cu Gobernador Boekhoudt a tene su mes na nos Orden di Ley a base di un berdad cu no por destrui!
