Prome Minister a duna pabien oficial na Roderich Lopez y su Scol di Asambeho

E grupo cu a hiba Aruba su cultura na Magic Kingdom

ORANJESTAD (AAN): Recientemente a tuma luga un anochi di reconocemento, pa cual Prome Minister Evelyn Wever - Croes a ricibi invitacion pa forma parti di e bunita ocasion. Sr. Roderich Lopez di Asambeho School Roderich Lopez a reconoce tur esnan cu a hacie posibel cu e por a presenta cu e grupo di asambeho den Magic Kingdom na Disney World. “Un bunita gesto pa esnan cu a pone Aruba su nomber resona den exterior!"

   “Mi ta kere cu e Mericanonan cu no ta conoci cu nos cultura a keda hopi sorprendi cu e presentacion. E tabata emocional, mi gemoed a yena y e tabata sumamente bunita pa mira,” Prome Minister a expresa.

   Un cos cu ta caracterisa e logro aki, ta e talento di cada uno den e grupo, e amor pa asambeho y determinacion. Premier Wever-Croes a expresa cu ta corda ora cu sr. Lopez a cuminsa papia di e posibilidad di realisa e presentacion for di prome cu pandemia. Te hasta a ricibi un grupo na Bestuurskantoor, pero pa motibo cu mester a cera frontera, esaki no por a bay door. Sinembargo danki na e vison,  liderazgo y determinacion di cada un di boso, awor a logra.

   “Den nomber di Gobierno di Aruba, mi kier gradici boso paso mi sa cu e no tabata facil. E tabata increibel pa mira tur locual boso a logra eynan pesey mi keir gradici boso. Boso a hiba e vibracion di Aruba, te den curason di Magic Kingdom e Reino Magico. Bo no sa ainda cuanto cosnan positivo ta bay bin di eseaki.”

   Finalisando Prome Minister a expresa cu Gobierno di Aruba tambe lo tin un momento pa reconoce tur cu a haci e presentacion posibel. Ta gradici henter e grupo, especialmente Roderich Lopez, pa su curason grandi pa asambeho, pa duna ehempel y pa inspira, cual ta locual mester na Aruba. Masha Pabien y Danki.