Parlamentario Ricky Hoek (MEP):
ORANJESTAD (AAN): Despues di añanan di deliberacion y evaluacion a yega na un vision concreto. Y asina cu yen di entusiasmo y alegria, profesionalnan di FMAA y SPD, arkitectonan, ministernan y parlamentarionan a presencia e momento maraviyoso caminda cu su excelencia Minister Rocco Tjon den compania di su excelencia Prome Minister Evelyn Wever-Croes a pone e prome piedra pa e edificio di Stichting Hunto.
Ta for di oktober 2020, pa medio di un memorandum of understanding (MoU) a cuminsa cristalisa e vision di uni Fundacion pa Maneho di Adiccion di Aruba (FMAA) y Social Psychiatrische Dienst (SPD) bou di un solo fundacion cu lo hiba e nomber di Stichting Hunto. Enfoca riba cliente cu ‘dubbele diagnostiek’, cu ta ensera cu e cliente tin problema cu adiccion y salud mental.
Pakico Stichting Hunto?
E problematica di adiccion y di adictonan ambulante ta creciendo y e instancianan ta desea di mehora nan servicio y brinda miho cuido y atencion na e clientenan. Asina a bin un colaboracion pa traha na un forma integral y MoU entre stakeholdernan FMAA, SPD, Huisartenvereniging (pa haci e cuido mas acesibel), FADA, Bureau ondersteuning verslavingszorg, Respaldo, Directie Volksgezondheid y representacion di Ministerio di Husticia y Asunto Social.
E meta tras di esaki ta pa e cliente rehabilita y reintegra bek den comunidad. Tambe door di traha den forma integral, lo reduci e lista di espera door di amplia e prome liña di cuido y reduci e presion riba e cuido specialisa.
Un parti hopi esencial di e fundacion ‘Stichting Hunto’ ta, cu lo brinda tambe un seccion special pa mucha y hoben cu tin problema cu adiccion y salud mental.
Vision, costo y aprobacion
A base di e vision di plan di maneho di Ministerio di Husticia y Asunto Social y tambe Gabinete Wever-Croes II e proyecto ‘Stichting Hunto’ ta cristalizando. Principalmente door di e.o. restructuracion di alocacion di fondo di 600 mil florin den presupuesto 2022, MoU’s (por ehempel door di a percura pa hunto cu profesionalnan di Directie Financien y DWJZ pa yega na nota di cambio pa trata presupuesto 2022). Positivo ta cu e representantenan di pueblo, miembronan di Parlamento di Aruba tambe ta consciente di e necesidad pa bon cuido y ayudo na e sector aki y di tal manera a aproba e presupuesto 2022, pa e proyecto bira realidad.
Palabra di felicitacion y exito
Por ultimo Hoek ta felicita tur stakeholder cu nan aporte constructivo na e proyecto ‘Stichting Hunto’. Na Conseho di Minister, principalmente Minister Tjon. Y ta desea tur profesional y e grupo di GGZ, presidi pa señora Sharline Koolman hopi exito cu e magnifico proyecto aki.
