Ora cu habri frontera cu Venezuela
ORANJESTAD (AAN): Durante di tratamento apertura di frontera cu Venezuela den Parlamento, Prome Minister Evelyn Wever - Croes a trece preocupacion di DVG dilanti. E preocupacion ta encera e presion financiero cu ta bin riba AZV, cual ta importante pa Parlamento tene cuenta cu ne.
Un aspecto cu a worde pidi di parti DVG na gobierno pa tene cuenta cu ne den e decision pa habri frontera of no, ta encera e impacto cu esaki lo por tin riba fondo di salubridad.
DVG a indica cu na e momentonan aki tin situacion cu docternan ta duna consulta na personanan cu no ta documenta y cu no tin AZV, y cu nan ta keda cu cuentanan di 200 pa 300 mil Florin pa luna cu no ta worde paga. Na fin di dia gobierno tincu paga esey, pues ta papiando di hopi placa, Prome Minister a expresa.
Banda di esaki, Prome Minister Wever - Croes a informa na Parlamento cu tin presion cu ta bin di organizacionnan internacional, pa Aruba duna e refugiadonan e status bou di AZV, pa cual Prome Minister a indica cu esaki no ta e momento pa haci esaki. “Parlamento mes ta testigo di con ta luchando cu AZV y con mester a tuma cierto decisionnan no pupular pa purba rescata e fondo.” Si haci esaki, no por garantisa cu e fondo tey ni pa e grupo di persona aki y ni pa otro hende, Prome Minister a termina bisando.
