Prome Minister a bishita Scol Basico Xander Bogaerts

Cuminsando e gran siman di celebracion di Dia di Betico 

ORANJESTAD (AAN):  Dialuna mainta, 22 di januari, Prome Minister Evelyn Wever-Croes a bishita Scol Basico Xander Bogaerts na San Nicolas.

            Prome Minister a haya un caluroso bonbini di alumnonan di klas 6 hunto cu cabesante Sra. Nadia Maduro.

            Tawata un mainta hopi agradabel y e alumnonan tawata bastante critico y a haci hopi pregunta y a mustra cu nan sa hopi di Betico. Nan ta hopi envolvi den nan comunidad y nan a expresa nan deseo di loke nan kier pa San Nicolas y con nan ta mira e desaroyo di pais Aruba. Tambe nan a expresa algun preocupacion grandi cu nan tin entre otro desempleo, ciudadanonan ambulante y personanan indocumenta.

            Prome Minister a gradici cabesante sra. Nadia y e docentenan pa e bunita mainta aki alabes a gradici nan pa e bunita trabou cu nan ta haci pa nos muchanan. “Mi ta felicita specialmente e muchanan aki pa asina tanto cos cu nan sa di Betico su bida, su lucha, logronan y sacrificionan. Nos tur tin un poco di Betico den nos y entre nan tambe tin lidernan futuro di nos pais Aruba”.

            Cabesante sra. Nadia Maduro tambe a tuma e oportunidad pa gradici Prome Minister Evelyn Wever-Croes pa e bishita y na e mesun momento a duna un “pluimpje” na e docentenan pa e preparacion di e alumnonan y a gradici e comision di nan scol cu e celebracion di Dia di Betico cu lo tuma lugar den grandi riba Diaranson 24 januari.