Sue-Ann Ras ta bolbe mustra preocupacion:
ORANJESTAD (AAN)—Sue-Ann Ras, Coordinador Nacional di Implementacion di Kinderopvang y Codigo di Proteccion na Ministerio di Asunto Social, a bolbe mustra su preocupacion tocante muchanan di 0-4 aña cu ta wordo hiba na actividadnan di carnaval, sin cu nan ta bao un ambiente confortable pa nan edad.
Ras a expresa cu e concientizacion mester bin di mayornan tambe, y parada di carnaval no ta un lugar pa muchanan entre 0 pa 4 of 5 aña, aunke e ta un actividad di mucha, no ta un lugar pa mucha chikito asina aki.
E mucha ta wordo expone na biento, solo, sonido, e inconfortabilidad cu pa dos ora minimo, por ta, un mucha chikito ta hinca den dje, por ta den su carrier of stroller, esey no ta adecua pa un mucha chikito asina.
Sue- Ann Ras a expresa cu esaki ta un preocupacion grandi cu su departamento tin aworaki, y nan ta trahando riba dje na e momentonan aki pa bin cu un maneho mas structura pa locual ta bay bira aña 2025.
No obstante, Ras ta haya cu den esaki tin un tiki discrepancia. Ta mira e necesidad pa bin cu un ley pa duna mayor boet, pero ley so no ta soluciona e problema, na banda mester di un maneho y un proceso. E ta puntra kico ta gana cu bin cu ley pa duna mayor boet? Sue-Ann Ras a señala cu na Aruba tin un cultura unda mester sinti nan mes menaza cu algo, pa wak si por tin un miho conducta, pues nan principio y balornan, educacion cu nan tin den cas, mester sa cu si e tin mucha chikito carnaval no ta un lugar apto pa su yiu.
El a agrega cu tin e tendencia den mayornan hoben na bisa cu tempo nan tabata chikito nan mayornan tambe a hacie cu ne. “Pero por ta e tempo ey tabata un otro tempo; bo no por keda haci locual bo tabata haci e tempo ey pasobra bo ta haya e resultado cu nos ta hayando. Aworaki nos sa, nos tin nos sano huicio cu no ta apto pa mucha ta den solo, pasobra nos coy e parada di ayera, el a sali 2 or di merdia y nos sa cu e solo di mas halto cu bo ta haya ta entre 10’or cu 3’or di atardi”, Su-Ann Ras a señala.
El a subraya cu aunke cu e mucha ta tapa, simplemente e no ta un lugar a un mucha den edad di 0 pa 3 of 4 aña ta hinca den carnaval.
