Prome Minister a bishita e rotonde na Eagle Beach pa aprecia e obra di arte ‘driekiel’ cu a wordo instala

ORANJESTAD (AAN): Dialuna atardi, Prome Minister Evelyn Wever-Croes a bishita e rotonde na Eagle Beach pa aprecia e obra di arte ‘driekiel’ cu a wordo instala,

como recordatorio di ta e prome habitantenan di pais Aruba. Prome Minister a expresa di ta emociona di por mira un obra di arte asina grandi, bunita y bon acaba cu ta dorna e paisahe di nos isla, y ta den bista di tur ciudadano y bishitante. Hopi ta esnan cu ta pasa riba e rotonde pa admira e obra aki, y hasta baha pa por saca potret.

            E driekielnan ta tortuganan hopi particular, cu ta bin Aruba pone nan webonan y ta bay bek pa bolbe despues di hopi aña. E chikitonan cu ta nace aki, tambe ta bolbe bek Aruba pa pone nan webonan, y asina e circulo ta sigui. A scoge pa pone e obra aki banda di Eagle Beach na unda cu semper e tortuganan ta bin pa pone nan webonan.

            "Impresionante tabata e momento cu mi a wak un driekiel subi tera den oranan di marduga pa pone su webonan, y mas impresionante ainda ta ora bo tin e honor di wak e tortuga chikitonan nace. Mi kier a gradici na prome luga, nos artista local, Gilbert Senchi y ful e ekipo di ARTiosa, cu a tuma e encargo di crea un obra inmensamente bunita pa nos dushi isla Aruba”, Prome Minister a expresa.

            Prome Minister ta gradici tambe Aruba Tourism Authority (ATA), UNOCA, y TPEF pa contribui cu fondo pa asina por a finalisa esaki, y tur otro cu di un of otro manera a brinda nan sosten. Sin lubida sr Alex Nieuwmeyer den feliz memoria cu semper tabata tin e deseo pa trece e obra aki Aruba. “Mi ta spera cu e arte di e driekiel aki, corda nos na e resiliencia, forsa y amor cu nos cada un tin pa nos dushi isla", Prome Minister a expresa.