Prome Minister a asisti na e ceremonia di e celebracion di 450 aña di Universiteit Leiden

Recientemente Aruba a cera un MoU cu e Facultad di Medicina di e universidad

ORANJESTAD (AAN): Siman pasa Diabierna a tuma luga e celebracion di e 90 lustro di Universiteit Leiden. 450 aña pasa Universiteit Leiden a ser funda y ta e universidad di mas bieu di Hulanda

   Pa e ocasion aki Prome Minister Evelyn Wever-Croes y Minister Plenipotenciario Ady Thijsen a ricibi invitacion pa asisti na e ceremonia oficial di e 450 Dies Natalis di Universiteit Leiden na St. Pieterskerk. A trata di un e ceremonia solem y conmovedor cu hopi invitadonan special.

  Den transcurso di añanan , centenares di Arubiano a studia y obtene nan titulo na Universidad di Leiden y den actualidad tin varios studiante Arubiano na e universidad. Universiteit Leiden ta alma mater di Prome Minister di Aruba y tambe di Prinses Beatrix, ken tambe tabata presente pa e ceremonia.

  Prome Minister ta indica cu recientemente Aruba a cera un MoU (Memorandum van Overeenstemming) cu e Facultad di Medicina di Universiteit Leiden y asina crea mas posibilidad pa studiantenan di Aruba por haya cupo pa specilisacionnan.

   “Mi ta contento di por a asisti na e ceremonia. Apesar di e schedule druk, nos por a traha tempo pa por tey na Leiden y atende esaki. A trata di un momento hopi special y solem, pero tambe un momento pa celebra e cooperacion entre Aruba y e universidad importante aki. Minister Plenipotenciario Ady Thijsen tin bon contacto y bon relacion cu e universidad di Leiden, mescos cu mayoria universidad na Hulanda pa asina logra bon palabracionnan pa nos studiantenan”, Prome Minister a expresa.