Minister Ursell Arends:
ORANJESTAD (AAN): Proximo siman lo tuma luga, pa prome biaha, un foro caminda varios entidad publico, semi publico y priva lo bini hunto pa contribui na defini loke ta bay ta e plan di maneho di Aruba pa cu adulto mayor.
E encuentro ta un iniciativa di Ministerio di Asuntonan di Adulto Mayor hunto cu Banco di Seguro Social (SVb), Seguro Medico General (AZV), Fondo di Pension di Sector Turistico Aruba (PFTSA), Fondo di Pension General Aruba (APFA) y Organisacion di Penshonado Publico Arubano (OPPA).
Durante dos dia, casi 135 stakeholders invita, lo sinta pa haya presentacion, pero tambe dialoga pa fiha un maneho cu tur esunnan envolvi den e bida y bienestar di adulto mayor. Di e manera aki kier pone un topico cu a neglisha pa demasiado tempo, sak’e for di contexto politico y dun’e su importancia mereci pa produci un vision pa e proximo 10 aña cu tur hende ta di acuerdo cu ne.
“Mi ta kere cu como comunidad y gobierno di Aruba, nos debe esaki na nos adultonan mayor pa e Aruba cu nos a hereda awe y ta nos deber pa garantisa nan un bon calidad di bida awor cu nan a yega nan edad di pension,” asina Minister di Asuntonan di Adultonan Mayor, Ursell Arends a duna di conoce. Hunto cu su ekipo a scoge seis tema pa traha riba dje, esta mobilidad, demografico, vivienda, cuido, bienestar y representacion.
E mandatario a splica cu e ultimo ta uno importante ya cu fuera di e 3 mil pensionado for di sector publico cu ta representa pa OPPA, tin casi 18 mil pensionado di sector priva cu no tin ningun instancia pa defende nan interes. Esaki ta un tema cu sigur lo discuti durante e foro, segun Minister Arends. E conclusion y proyectonan cu sali for di e foro lo ta reparti riba corto y mediano plaso, caminda ta premira algun inicio tumando luga, ya caba, prome cu fin di 2023 y otro durante proximo aña.
Un ehempel di esaki ta e lista cu 600 adulto mayor wardando riba un vivienda. Durante e foro lo discuti e situacion, lo tende di e stakeholders corespondiente y hunto lo yega na posibel solucion. Fuera di esey, Gabinete Wever-Croes II ta promove un proyecto pa produci mas trahado pa e sector di cuido; un asina yama leerwerktraject caminda sector publico y priva lo uni forsa pa bin cu e sede, recurso y acreditacion pa studiante core stage den area di cuido, administracion y alimentacion geriatrico y asina eleva e calidad di casnan priva di cuido.
E foro ta dianan diamars 17 y diaranson 18 di october proximo y ta exclusivamente pa stakeholders, sinembargo, Minister di Asuntonan di Adulto Mayor lo informa riba e manera con lo por sigui e desaroyonan di esaki a traves di diferente plataforma. Posteriormente, tambe ta organisa un Golden Age Expo den luna di november caminda lo brinda oportunidad na diferente stakeholder pa comparti informacion valioso cu e comunidad di adulto mayor riba e isla cu e meta di brinda servicio, pero tambe recluta miembro y boluntario pa servicionan cu ta na nan propio beneficio.
