Procedimento den Corte Federal na Alabama
BIRMINGHAM: Documentonan di Corte cu a wordo presenta Diabierna cu a pasa, a indica cu e detenido Joran van der Sloot, kende ta ainda e sospechoso principal den e desaparicion di Natalee Holloway na 2005, tin intencion di declara su mes culpable den un caso federal cu ta acus’e di a trata di extorsiona placa for di e mama di e teenager perdi.
Un hues federal a marca e fecha di Diaranson 18 di October, pa audiencia pa tende declaracion y dicta sentencia den e caso di Joran van der Sloot naciudad di Birmingham, Alabama. Anteriormente el a declara su mes no-culpable den e caso.
Joran a wordo extradita for pa Alabama procedente di Peru, unda e ta sintando un castigo di 28-aña despues di a confesa di e asesinato di un dama Peruano na 2010.
Natalee Holloway mes a desaparece durante un viahe di graduacion di High School na Aruba. El a wordo ultimo biaha mira ta bandona Carlos ‘n Charlie’s cu Joran van der Sloot, kende tabata studiante na scol internacional riba e isla. E desaparicion misterioso a trece hopi aña di cobertura di prensa y cantidad di raportahe y documentario. Joran van der Sloot a wordo identifica como un sospechoso principal y a wordo aresta pa interogacion, pero nunca a wordo acusa oficialmente.
Fiscalnan na Merca a indica cu na 2010, Joran van der Sloot a busca di haya placa di Beth Holloway y cambio di esey lo bay divulga e lugar unda e curpa di su yiu muher ta poni. Un grand jury e aña ey na Merca a dune citacion pa bin duna declaracion den Corte.
