Era di transicion mundial den e dolor produci pa un siglo di guera
*Confirmacion di IMF cu no tin pronostico economico pa futuro
*Lamento Fondo Monetario Internacional segun pronostico DIARIO
ORANJESTAD(AAN)—Cu produccion di informacion pa su lectornan, ta un asunto sumamente serio pa DIARIO, ta keda confirma na e relatonan cu durante ultimo dianan a mira luz den prensa mundial a base di declaracionan di Fondo Monetario Internacional.
A base di deliberacionnan cu expertonan riba nan tereno manera semper, nos a presenta Aruba e berdad di resultadonan cu Guera na Ukraine y confrontacion militar na Medio Oriente, tin pa e crecemento economico di mundo, di cual situacionnan financiero nacional sano y bienestar di hende liber, ta depende.
DIARIO a splica con e desaroyo aki a tuma lugar, na momento cu Fondo Monetario Internacional, tabata reuni y a presenta nan rapport cu proyeccionnan pa 2024, cu tabata mustra cu mundo no a recupera completamente di e pandemia y di Guera di Ukraine y e ola di inflacion di 2022, cu por bolbe realidad na entrada di 2024.
Awe pa duna entrada na su publicacionnan anual ariba proyeccionnan pa e aña nobo 2024 cu ta dilanti porta, DIARIO ta tuma como punto di partida e declaracion oficial awor di Fondo Monetario Internacional, cu ta lamenta perdida di bida humano y dolor incalculabel pa mundo.
Fondo Monetario Internacional, cu ta asisti Aruba tambe den un bon maneho di placa, ta emiti relatonan riba loke por spera pa futuro y manera DIARIO a anuncia a raporta cu na prome instancia tabata spera cu situacion mundial lentamente lo a cambia pa mihor.
E rapport aki a mira luz, manera awor oficialmente ta wordo anuncia, na momento cu e crisis na Medio Oriente a presenta y DIARIO a adverti Aruba, cu por spera cu Fondo Monetario Internacional, lo mester revisa su pronostico.
Den su reaccion riba e situacion mundial nobo, e fondo monetario internacional, ta papia di desastrenan natural pero ta considera peor ainda, e desaroyonan na Ukraine y na Medio Oriente, cu tambe lo afecta e proyeccionnan di IMF, cu mester ahusta su promesanan pa un futuro.
Mientras Fondo Monetario Internacional ta lamenta perdida di bida, e ta mustra riba e forma cu shocks ta bira normal na mundo, cu a wordo debilita pa confrontacion den guera despues di Covid-19 y e invasion Ruso na Ukraine y awor e crisis na Medio Oriente.
Na entrada di un siman nobo, e informacionnan serio di parti di Fondo Monetario Internacional, ta afirma pues e informacionnan, analisis y expectativanan cu DIARIO ta presenta na Aruba, cu como destino turistico sigur mester vigila loke ta pasa na un mundo den problema serio cu su mes.
Awe DIARIO ta duna inicio na su publicacionnan tradicional di fin di aña y cu mester asisti Pueblo di Aruba den e transicion di 2023 pa 2024.
Na un momento cu mundo mester tabata uni den esfuerzo pa confronta e cambio di clima cu realmente ta e prijs cu hende ta paga pa progreso incontrola durante un Siglo, central ta bira e forma con hende durante un siglo, a logra di deshaci di su logronan enorme y destrui su propio progreso pa cambia e mundo prometedor cu a wordo planifica, den un centro di dolor y angustia.
E posicion aki di DIARIO ta e punto central di e Fondo Monetario Internacional tambe, cu a produci uno di e rapportnan mas comovedor cu DIARIO a yega di atende pa informa publico.
Despues di un Siglo den cual hende hasta a logra alarga su bida cu adelantonan enorme manera hasta transplante di curazon, metodonan nobo pa confronta peliger na tur forma, hende a produci guera cu a destrui continuamente e logro cu hende a alcansa.
Na Siglo 20, petroleo por ehempel a crea fortunanan enorme cu a permiti hende pa medio di comunicacion y transportacion moderno, descubrimentonan cu a alarga bida y bienestar di hende, pone un base nobo pa su futuro.
Progreso di hende a haci posibel pa meteorologonan por a pronostica cambio di clima cu lo a nifica salida di petroleo y apertura pa combustibel nobo.
Kico 2024 lo presenta na hende? E colapso di un Siglo di guera y destruccion cu a cuminsa dia 28 di Juli 1914 cu e prome guera mundial cu ta prolonga su mes te awe cu hende ta destrui su mes rond mundo?
Na entrada di 2024, con e mundo cu ta entrega na generacionnan nobo, a wordo destrui pa e generacionnan saliente cu a haya oportunidad pa studia, pa traha riba nan adelanto, pa crea oportunidadnan na mundo?
DIARIO siman pasa a entrega Aruba e realidad di e relato historico di Fondo Monetario Internacional, cu mester a splica posibilidad pa mundo sigui cana den futuro, cu a wordo completamente afecta pa produccion di destruccion di guera.
Awe Fondo Monetario Internacional ta en espera di resultadonan di guera na Ukraine, na Medio Oriente, rond mundo, pa por trata di dirigi mundo den un direccion economico nobo.
