Prome Diadomingo di November lo tin gran Bike Ride di Mary Joan Foundation

Organiza pa Shoco Legends Aruba

ORANJESTAD (AAN): Den oranan di atardi, Stella Vrolijk di Mary Joan Foundation hunto cu Shoco Legends Aruba y demas grupo di Harley a convoca un conferencia di prensa na Jungle Vibes, pa anuncia cu un biaha mas lo bay tin e Bike Ride dia 6 di November, cuminzando pa 4:00 pm for di Urataca Center.

   Manera por corda, e grupo di Shoco Legends Aruba a tene e Ride aki na 2021 pa prome biaha, y na 2022 lo ripiti’e atrobe.  E Bike Ride aki ta pa recauda fondo pa asina Mary Joan Foundation por logra su metanan e aña aki.

   Andre Geerman kende ta vice-president di Shoco Legends na su turno a bisa cu e ta manda invitacion caba pa tur Bikers di Aruba, sea ta Harley, Scooter, ATV, contal cu bo ta core concientemente y usa bo helm tambe.

   El a bisa cu e Bike Ride di Diadomingo 6 di November lo sali for di Urataca Center, y sigui pa Santa Cruz, bay direccion pa Palm Beach, y despues ta bay para banda di Ling’s na Monserat unda lo haya snackbox y boter di awa.  Despues di e break aki, lo sigui bek pa pasa Palm Beach, y finaliza esaki na Jungle Vibes cu ta situa na Coral Plaza riba Avenida Nelson Oduber.

    Aki lo tin entrega di premio, y despues entretenimento di Jerino cu D’-Licious.

   Dianan di Inscripcion: Geerman a bisa cu ta bay duna chens riba dos diferente fecha pa Bikers por inscribi.

   E prome lo ta Diahuebs 13 di October como e fecha pa inscribi.  Esaki lo ta for di 5:00 pm te cu 7:00 pm, unda Stella y Arabella lo bay tey pa atende e inscripcion.

   E di dos lo ta Diahuebs 27 di October tambe pa inscripcion, y e lo ta 5:00 pm pa 7:00 pm.  Tur esaki na Jungle Vibes na Coral Plaza.  Inscripcion ta costa binticinco Florin, y cu esaki lo bo haya un pin, un cinta, un bandana, un snackbox, y un boter di awa como gradicimento pa bo participacion.

   E placa cu bo ta paga pa inscribi, ta bay pa Mary Joan Foundation y e ta pa un bon causa.

   Nan ta pidi tur hende cu bin cu nan motorcycle, pa percura pa bo papelnan ta na ordo, y cu bo tin helm riba bo cabez.  Asina ta cumpli cu tur regla y ley.

   Mary Joan Foundation tambe ta preparando pa bay ricibi inscripcion na comienzo di November, y esaki lo  wordo anuncia despues.

   Nan ta hopi agradecido pa e yudanza di Shoco Legends Aruba pa e yudanza logistico pa e organizacion di e Bike Ride aki.