E lucha di Mike Petronia a logra husticia pa su yiu:
ORANJESTAD (AAN) – Señor Mike Petronia, tata di e hobencita Sayuri Petronia, cu a worde asesina na su cas na San Nicolas, a gradici prensa cu semper tabata cune for di comienzo di e sucedido y a duna e caso siguimento. Asina el a declara den un entrevista. E ta gradici cu prensa a trece dilanti su mensahenan, cu e tabata tin pa pueblo di Aruba.
Diaranzon tabata tin e Caso den Corte, y señor Petronia a duna di conoce cu Huez a repasa henter e caso y kico e acusado a haci. Un par di cos el a laga afo, y ultimo cu e Huez a trece dilanti ta kico e psicologonan tanto di Hulanda, como di Aruba a bisa. Banda di e castigo di prison (9 aña) e acusado ta worde obliga na tuma tratamento psikiatrico TBS. (TBS ta nifica tratamento obligatorio den un institucion na Hulanda).
“Huez a dicidi pa castiga e acusado como mayor di edad. Fiscal, na prome instante, a pidi 11 aña plus TBS, pero ora fiscal a scucha e sicologo y psikiatranan di Hulanda cu Aruba, el a baha e castigo di 11 pa 9 aña plus TBS.
A bay di acuerdo cu e acusado tin cu worde castiga como mayor di edad, y el a bay di acuerdo cu Fiscal cu 9 aña y e TBS tambe mester bin cune. Kiermen, ora e caba di sinta su castigo, si ta 9 aña of ta menos, e ta duna gobierno suficiente tempo pa regla esey; kiermen, cu e asunto di TBS worde poni na su lugar”, señor Mike Petronia a señala.
El a agrega cu e Huez ta haya cu e acusado mester di ‘tbs’ pasobra esaki ta traha riba e persona pa e drecha. Si e no drecha den e tempo ey nan ta sigui traha riba dje. Pues, e no ta manera e otro situacionnan cu tin, cu e acusado ta bay den e instituto coreccional, pero e ta sali. TBS ta algo cu e persona mester bay aden.
“Kiermen, gobierno tin suficiente tempo pa regla esaki y ami tambe lo bay ta riba gobierno pa regle”, señor Petronia a remarca, pasobra p’e e asunto no a caba.
“Mi a logra, pero satisfecho si mi no ta, pasobra mi no tin mi yiu. Logra mi a logra, pasobra si mi a keda keto e cosnan lo tabata diferente; por ta e a worde castiga como menor di edad, e lo no a haya TBS. Kiermen, den e sentido ey cu ami, tur Sayuri su amigonan, tur mi amistadnan, mi famia, hendenan cu ami no ta conoce mes, pasobra na prome instante mi a cuminza haya ayudo di hopi hende, di Hulanda, Merca, Colombia, Aruba. Tur hende a cuminza yuda mi cu material, mi a haci un conferencia di prensa akinan mes. Pues, si mi a keda keto cosnan lo tabata diferente tambe”, señor Petronia a reitera.
