HOH, LabHOH y Bloedbank di awo padilanti ta un solo team
ORANJESTAD (AAN): Diabierna mainta, 30 di juni den un esfera super ameno a tuma luga e ultimo paso pa asina finalisa e fusion huridico entre e tres organisacionnan esta Stichting Ziekenverpleging Aruba (SZA), Fundacion Servicio Laboratorio Medico Aruba (FSLMA) y Stichting Bloedbank Aruba (SBA).
E fusion huridico ta un finalisacion di e cooperacion ya existente entre e tres organisacion y e integracion cu ya caba ta andando pa hopi aña. Hunta di Directiva, esta sr. Jacco Vroegop y sr. Gregory Croeze di e tres organisacionnan tabata presenta conhuntamente cu algun miembro di e team di maneho y tambe representantenan di e tres organisacionan pa hunto celebra oficialmente e fusion aki.
E momento historico aki a tuma luga na Notaris Johnson unda cu awo tur tres organisacion a bira hunto one team bou di maneho di SZA. Sr. Jacco Vroegop, presidente di e Hunta di Directiva di HOH na final a hiba palabra y a menciona “mi ta hopi orguyoso di e trayecto tras di lomba y e trabou duro cu a eherce pa por a yega na e momento historico aki. Danki na tur hende cu a haci e logro aki posibel y cu awe nos por yama nos mes oficialmente one team.”
E fusion aki, pues e integracion di e tres organisacionnan aki lo trece cune reduccion di gasto riba diferente nivel. Hopi cos no lo cambia pa e empleadonan mirando cu e organisacionnan ya pa hopi tempo ta traha hunto pa un solo meta y semper t’ey pa pashent, cliente y bishitante brindando cuido di calidad. E fusion aki siguramente lo bay hiba na un organisacion mas eficiente cu reduccion di gasto cual lo por bay wordo inverti den nos propio hendenan y alabes eleva calidad di cuido.
Durante e firmamento di e acto notarial na Notaris Johnson tabatey presente pe momento historico aki banda di Hunta di Directiva y algun miembro di team di maneho tambe representante di Bloedbank, sr. Fabian Werleman como tambe Ilan Jacobs di LABHOH y sra. Renita Blindeling di HOH. Vroegop a comenta cu den e siguiente lunanan lo caba di finalisa e forma nobo di traha y colabora cu otro. “Keda cu pasenshi y cu confiansa paso na final ta pa un bunita meta”, asina Jacco Vroegop a subraya. E vision di one team ta pa por brinda cuido accesibel pa tur hende sin compromete calidad. E calidad ta loke cu e organisacionnan ta duna y esaki sigur ta algo cu Vroegop ta orguyoso di dje.
Gregory Croeze, miembro di Hunta di Directiva di Hospital a gradici y alabes recorda tur hende cu awo a firma un fusion huridico y cu e trabou mes pa yega na eficiencia ta cuminsa awo. “Claro cu na un principio lo mester canalisa tur forma di traha y pone nanishinan den e mesun direccion, pero hunto como one team lo logra esaki”, Croeze a termina bisando.
Marisol Tromp, hurista na Hospital a conta cu e trayecto pa e fusion huridico a inicia na october di aña 2021. Aki a cuminsa traha riba e idea di fusion y dun’e forma. A papia cu e trahadonan di e tres organisacionnan y durante e añanan a sigui a prepara tur e documentonan y tambe a cana e pasonan legal. Semper a keda involucra e coleganan den e proceso y awo a yega e paso final cu ta firma e acto notarial pa e fusion huridico.
E fusion di e tres organisacionnan pa un organisacion cu a wordo realisa no lo tin consecuencia pa e cuido cu ta brinda na publico pero mas bien internamente unda e trahadonan awo lo ta den servicio di hospital. Awo lo sigui padilanti como one team y esey ta e logro di mas importante di e fusion aki cu lo ta na bienestar di calidad di cuido pa comunidad di Aruba.
{gallery}HOH, LabHOH y Bloedbank{/gallery}
