Pa hobennan cu no a caba scol y ainda ta sin trabao
ORANJESTAD (AAN): Si abo como mayor ta mirando con bo yiu, of un sobrino of otro miembro di famia a kita for di scol y no ta tumando les mas, pero no ta hayando trabao tampoco... un chens unico ta presentando su mes pa e drenta den un programa cu lo bay yude haya tur animo pa busca un trabao, cu interes cu e lo bay gusta inmensamente, of kizas hasta un dia yude bira doño di su propio negoshi.
Esey ta meta di e programa “In The Picture”, cu Fundacion Ja Ik Aruba ta bay ofrece gratis na como 20 hoben di entre 18 y 28 aña na Aruba, pa nan por haya orientacion necesario, y habilidadnan pa bay haci trabao y haya empleo den un carera cu kizas nan lo gusta pa resto di nan bida.
E coach Jalken Antonia a haci esaki pa hopi aña caba na Hulanda, cu experiencia amplio como un gran catalisador cu ta yuda e hobennan aki bay dilanti y logra algo, ni maske nan ta drop-out di scol. Cu yudansa di scolnan SPO di Aruba, y tambe di Colegio Nigel Matthew, el a forma gruponan caba. Awor e chens ta pa yuda demas hobennan tambe di Aruba pa nan participa den e programa aki.
El a indica cu maximo 20 hoben nan por tuma, pues tin di core inscribi na email di:
This email address is being protected from spambots. You need JavaScript enabled to view it.
of na telefon 744-0625.
Den un entrevista cu DIARIO, Jalken Antonia a indica cu nan meta ta pa e participantenan bira conciente di loke nan por cambia pa logra nan metanan. Nan lo haya esaki no djis den teoria, pero tambe siña di practica. Nan lo bishita diferente compania pa nan siña e parti practico di e ambiente di negoshi. Nan lo reta nan tambe pa desaroya nan pensamento critico y analitico. Durante e bishita nan lo por aplica e teoria cu nan a siña pa cu liderato personal, responsabilidad y e actitud y comportamento di un entrepreneur pa pone nan mes “In The Picture” pa asina haya un chens di empleo.
Loke e programa kier logra cu e hobennan, ta pa capacita nan pa participa den sociedad y subi bay halto di nivel. E participante lo adkiri un vision di e habilidadnan desea cu ta importante pa tin exito den un organisacion. Asina lo yuda e participante haya un vision di su talentonan, y expande su network di negoshi, aumenta e percepcion di e participantenan y e realidad di mundo di negoshi, y motiva e participantenan pa nan gara y completa nan educacion.
Jalken a insisti hobennan cu kier forma parti, pa inscribi rapido pasobra e maximo ta 20 hoben.
