Universidad di Aruba celebrando 35 aña di existencia
ORANJESTAD (AAN) — Universidad di Aruba a celebra, Diabierna 8 di September, su di 35 añanan di existencia. Den entrevista cu DIARIO, señor Juri Nicolaas, Presidente Curator a cuminza bisando: “Mi kier gradici na prome lugar, e realidad cu nos ta para awe riba e schouder di tur esnan cu a bay nos dilanti, tambe for di bestuur y e rectornan di Universidad cu a kere den e vision cu na Aruba nos por tin un Universidad cu por brinda na nos studiantenan y tambe na comunidad di Aruba, un educacion avanza cu no tur ora nos tin cu bay afo pa busca esaki. Por lo tanto pa nos awe ta un dia cu eigenlijk nos ta wak bek pa nos siña di tur e retonan cu nos tabata tin e ultimo añanan, pero pa cu e ‘lessons learned’ manera nos ta bise, pa nos wak con den e 35 añanan, nos a zorg pa e posicion cu Universidad di Aruba tin na e momentonan aki como un Universidad cu ta wordo reconoci, y mi ta kere cu ta interesante pa resalta, cu tur e programanan cu nos ta brinda ta acredita” Curator Nicolaas a expresa.
El a agrega cu esey ta pone cu aunke nos studiantenan ta scoge pa studia na Aruba, nan tin un “aansluiten” na educacion avanza, sea na Hulanda of na Merca.
“Pues, pa nos ta un dia di orguyo pero mas cu tur cos, un dia di gratitud. Gratitud pasobra si no ta pa e confianza cu studiantenan ta brinda na nos universidad pa nan inscribi y bin studia akinan, eigenlijk nos no tabata tin un universidad tampoco cu nos por celebra awe, su di 35 aña”, Presidente Curator Nicolaas, a señala.
Señor Juri Nicolaas a expresa cu studiantenan na Aruba tin hopi oportunidad na UA mes. Obviamente, UA no ta traha riba su mes. E ta traha den un cadena; e ta un approach integral hunto cu Ministerio di Educacion, cu tin cu zorg pa semper UA por sigui brinda e posibilidad pa studiantenan por sigui studia na Aruba. E oportunidad di lening tin, y nos ta wak cu e oportunidad ey ta wordo tuma. Nos ta hopi positivo cu e rol cu Universidad di Aruba ta bay sigui hunta te den futuro”, señor Nicolaas a acentua.
El a remarca tambe, cu UA ta bezig ta mirando tambe con nan por duna mas “deeltijd” opleiding, pasobra no solamente hobennan cu ta bira mama, pero hende cu ta trahando den nos comunidad, kier avanza den nan estudio pa tin un miho posicion. Tur esey UA ta pensa riba dje y ta hinca den su plan estrategico pa zorg un programa accesible pa e personanan aki.
