Edwin Roos di Wit Gele Kruis:
ORANJESTAD (AAN): Un Gecombineerde Leefstijlinterventie (GLI) ta un programa cu ta yuda personanan adopta un estilo di bida mas saludabel. E programa ta combina guia pa alimentacion saludabel, mas movimiento, suficiente descanso y cambio di custumbernan. E meta principal ta pa desaroya costumbernan saludabel cu ta duradero, reduci sobrepeso y disminui riesgonan pa salud.
Durante un entrevista reciente cu DIARIO, señor Edwin Roos di Wit Gele Kruis a splica cu na Hulanda sobrepeso ya ta wordo reconoci como un malesa. Na Aruba, sinembargo, esaki ainda no ta e caso. Pa motibo di e statutonan actual di AZV, gastonan relaciona cu servicionan preventivo no por wordo cubri facilmente.
Segun señor Roos, Wit Gele Kruis ta trahando actualmente riba un proyecto cu tin como meta pa AZV por cubri e gastonan di un programa asina bou di cierto condicionnan. Por ehempel, personanan cu tin sobrepeso combina cu diabetes por haya guia pa baha peso via enfermeronan, POH-nan y fisioterapistanan, cu lo fungi como lifestyle coach, semper bou di indicacion di un docter.
Den un prome fase, e intencion ta pa enfoca riba e grupo di personanan cu anteriormente a participa den e programa di Healthy Living Center.
Señor Roos a splica cu e meta ta pa implementa GLI di un manera mas structural, cu eventualmente tambe por inclui cobertura di gastonan relaciona cu otro malesanan di duracion largo.
E programa GLI generalmente ta dura entre un y dos aña. Segun señor Roos, ya den e prome seis luna por cuminsa mira cambionan significativo, bou di guia di lifestyle coachnan. E guia no ta enfoca solamente riba alimentacion mas saludabel y mas movimiento, pero tambe riba bienestar mental y emocional.
E meta final ta pa, despues di un periodo di aproximadamente dos aña, e participante por continua independientemente cu un estilo di bida saludabel. Di e manera ey, e programa no solamente ta beneficia e individuo, pero tambe por contribui na un comunidad mas saludabel y cu un miho condicion general.
