Patrick Werleman, director di Desaroyo:
ORANJESTAD (AAN)-- Patrick Werleman, Director di Desaroyo di Comite Olimpico Arubano (COA) a agrega den e conferencia di prensa, cu, naturalmente, e cuater topiconan cu e tema central di e Conferencia Anti-Doping ta encera, mester wordo presenta pa expertonan cu COA a invita y cu lo duna colaboracion na e evento aki, ta bin di e region, pero tambe di Merca.
E expertonan internacional cu COA lo tin e honor di ricibi y cu tambe lo ta honra den comparti nan experiencia y conocimentonan cu nos atletanan y esnan cu ta sostene nan, cu ta e enfoke principal di e Conferencia Anti Doping, nan nomber a wordo duna pa señor Werleman.
“Nos tin dr. Reginal O’Loughjlin, di Saint Kitts & Nevis, cu ta bay duna e tema di “Therapeutic use Exemption”.
Tambe tin dr. Karen Pilgrim, cu ta e chairperson di Caribbean Regional Anti-Doping Organization (RADO), y e ta bin di British Guyana, y e ta bay elabora riba e Riesgonan di Suplemento.
Nos tin tambe señora Grayson Potter, cu ta bin di Colorado Springs, e ta un colaborado y trahado di ‘U.S Anti-Doping (USADA) y e ta specializa den educacion di atletanan elite. E lo duna e sesion di ‘Anti Doping rules violations’. Pues, e ta un persona super experto den e tema aki. Y nos tin tambe dr. Adrian Lorde, cu ta bin di Barbados, y e ta ex-chairperson di Caribbean Anti-Doping Organization, y e ta bay presenta e tema di ‘Prohibited List’. Pues, nos tin expertonan internacional ta biniendo y nos ta haci un invitacion na nos atletanan pa ta presente y educa y concientiza nan mes y tambe e personanan cu ta apoya atletanan. E coachnan, medico, docternan, fisioterapistanan, nutricionisanan y tur esnan cu kier haya mas informacion, nan ta bon bini pa pa bin participa na e conferencia aki cu ta tuma lugar Diadomingo 6 di September, den ballroom di Hilton Aruba Hotel.
