Grupo Scout Ora Ubao ta inicia temporada scout cu exitoso Fun Camp pa bever y welpnan

ORANJESTAD: E fin di siman aki, Grupo Scout Ora Ubao (GSOU) a organisa un Fun Camp special pa su bever y welpnan, cu e meta di duna un inicio alegre y activo na e bijeenkomsten di scout despues di vakantie di scol.

E campamento a cuminsa diabierna pa 7’or di anochi na SKA, caminda e muchanan a yega contento y prepara pa un fin di siman yen di actividad. E prome anochi tawatin un Movie Night pa crea un ambiente relahante pa e participantenan cuminsa e campamento hunto. 

Diasabra, e programa a continua cu diferente post di wega y reto, combina cu actividad fisico, creatividad, concentracion y trabou den grupo. Entre otro, e muchanan a participa na un obstacle course, robotics, domino, Mens Erger Je Niet y UNO. 

E aventura a continua diasabra atardi cu un bishita na Casibari Rock Formation, unda e bever y welpnan a disfruta di un actividad di laser tag den un ambiente completamente diferente. Diadomingo, pa cera e Fun Camp riba un nota halto, e grupo a bishita Fly High, caminda e muchanan por a gasta nan ultimo energia y disfruta hunto prome cu nan mayornan a busca nan merdia. 

Durante henter e fin di siman, e groupleaders di GSOU tabata presente y atento pa garantisa cu tur actividad por a transcuri di manera sigur y agradabel. GSOU a conta tambe cu apoyo balioso di mayornan, especialmente cu transporte di e muchanan.

E actividad a wordo haci posible cu sponsor di ATHA, mientras cu mayornan a contribui pa cubri e resto di e gastonan. 

Despues di un fin di siman yen di wega, aventura y amistad, e muchanan a bay cas contento y yen di expectativa pa e proximo actividad di Grupo Scout Ora Ubao.