Kim Geurtsen, Human Resources Manager di The Ritz Carlton Aruba:
*15 studiante di EPI y Universidad a inicia trayecto di formacion
ORANJESTAD (AAN): The Ritz Carlton Aruba y The Aruba Marriott a anuncia recientemente e introduccion di un proyecto cu ademas di ta algo nobo ta algo hopi innovador pa loke ta e futuro hotelero di Aruba.
Ta trata di e programa FUTRX. cual ta un programa educativo den colaboracion cu Educacion Profesional Intermedio (EPI) y Universidad di Aruba (UA).
DIARIO tabata tin oportunidad di ta presente durante e prome sesion y a combersa cu tres persona cu ta parti di e team di profesionalnan cu lo ta guiando un grupo di 15 studiante den e trayecto aki. Nan a splica den kico precis FUTRX ta consisti.
Kim Geurtsen, Human Resources Manager di The Ritz Carlton Aruba a duna di conoce cu esaki ta un iniciativa di Marriott International hunto cu Ritz Carlton Aruba y Aruba Marriott pa crea e lidernan di futuro.
A bisa cu e constata cu tin un 'vergrijzing' den cierto areanan den e tereno di hospitalidad. Pesey a prepara un programa di 6 luna, te cu September, unda e studiantenan ta bay siña riba tur tema basico den hospitalidad, servicio, traha den hotel, casino, restaurant, etc.
Cada siman nan durante 6 luna ta bay tin un les di teoria (diaranson) y un les di practica (diasabra). Nan lo haya les di e lidernan di Ritz Carlton Aruba y Marriott Aruba. "Asina nos ta bay purba pa crea e futuro lidernan di Aruba", Geurtsen a remarca.
E idea aki, a bisa, a surgi ora cu hunto cu otro tres colega a cuminsa analisa e situacion hotelero actual teniendo na cuenta cu tin otro propiedadnan cu a habri of cu ta bay habri. Nan a pensa kico nan por haci como un compania den hospitalidad y traha hunto cu otro companianan pa wak con por sostene e futuro di Aruba creando mas smaak y pasion pa e profesion aki.
Asina nan a cuminsa cu e idea aña pasa na October. E aña aki na Januari a sinta cu EPI y UA pa wak con por a traha hunto. Despues a haci varios presentacion na scolnan pa informa tur studiante y wak nan interes pa participa den e programa.
Kim Geurtsen a laga sa cu e reaccion di e studiantenan tabata tremendo. Nan tabata hopi entusiasta y ora cu e lansa den media e programa siman pasa, a haya hopi bon 'feedback'.
"Nos ta hopi entusiasma pa wak con e programa ta bay e aña aki y pa wak si nos por sigui pa tur aña despues di 2022", a agrega.
Aworaki ta hopi importante pa alcansa e calidad di e programa y ora cu tin esaki lo por wak con por bira mas grandi y haya mas klasnan pa 'join' e programa pa e otro añanan. Kisas e ora lo por traha tambe cu otro scolnan manera Colegio Arubano of gewoon pa studiantenan cu ta cabando scol.
