Minister Oduber a duna reconocimento na mas di 80 empleado di Divi Resort riba nan Aniversario

ORANJESTAD (AAN):  Diaranson anochi Minister di Turismo Sr. Dangui Oduber tabata tin e placer y honor di por a duna reconocimento na 85 empleado di Divi Resort.

Esaki a sosode conhuntamente cu Director General di Divi & Tamarijn Sr. Marin Bijl. E tabata un anochi hopi ameno cu a tuma lugar den e ballroom di Alhambra. E trahadornan aki a cumpli nan aniversario den e tercer y cuatro cuartal di aña 2021 pero debi na e situacion di COVID e reconocimento a cay un poco atrasa.

            E 85 empleadonan aki ta traha den diferente area y diferente resort di Divi.

31 empleado a cumpli 5 aña di aniversario

27 empleado a cumpli 10 aña di aniversario

12 empleado a cumpli 15 aña di aniversario

3 empleado a cumpli 20 aña di aniversario

5 empleado a cumpli 25 aña di aniversario

6 empleado a cumpli 35 aña di aniversario

1 empleado a cumpli 40 aña di aniversario

            Divi Resort a habri su porta na Aruba den aña 1969 bou di e nomber Divi Aruba y awe tin 5 resort di Divi na Aruba. Hopi importante pa bisa ta cu 3 di e 5 resort nan aki ta di Timeshare. A keda demostra cu propietarionan di Timeshare ta cu Aruba den bon y den malo.

1. Divi Dutch Village Resort
2. Divi Aruba Phoenix Beach Resort
3. Divi Village Golf and Beach Resort
4. Divi Aruba All Inclusive Resort
5. Divi Tamarijn All inclusive Resort

            Minister Dangui Oduber ta manda palabranan di felicitacion y aprecio na tur e empleadonan di Divi Resort. Cada un di bosonan ta contrubui grandemente cu e sector turistico, brindando servicionan di calidad na nos bishitantenan. Minister Oduber ta bay sigui brinda e tipo di reconocimentonan aki na nos embahadornan turistico, paso nan ta e weso di lomba di e industria importante aki.

Turismo ta nos unico pilar economico y ta e driver di nos economia.