Fundacion ABO: BOCA Training a inicia
ORANJESTAD (AAN): Fundacion ABO a duna di conoce cu den luna di april nan a cuminsa cu e programa di BOCA pa ofrece PAP-test preventivo pa tur hende muhe na Aruba entre 24-65 aña, segun nan schema di invitacion.
Pa garantisa un screening di calidad, nan ta compromete pa train tur profesional di cuido cu ta haci e PAP-test ariba e teoria, tecnica y e proceso di e screening preventivo. Esaki ta trata mayoria dokter di cas y nan asistentenan, como tambe asistente di dokter cu ta traha na Horacio Oduber Hospital.
Durante e siman di 23-27 di juni 2025, a tene e prome BOCA-Training cu sosten di nan partner Bevolkingsonderzoek Nederland. Cu nan experiencia a logra train 50 profesional ariba teoria y 30 profesional ariba practica tambe. Ademas a train 3 dokter local cu lo keda encarga pa continuacion di e BOCA-Training aki via Fundacion ABO.
E curso aki ta consisti di un e-learning extensivo pero hopi detaya y tambe diferente tayer di practica (workshops) a tuma lugar.
E meta? Pa prome cu fin di e aña aki, tur profesional cu ta haci e PAP-test preventivo na Aruba ta bon getrain pa ofrece cuido preventivo di calidad via e programa BOCA!
Fundacion ABO ta duna un danki special na HOH Academy pa brinda e espacio y na Lucia Huijskes y Hilde Raaijmakers di BVO Nederland pa comparti nan conocemento y experiencia. Hunto, nos ta tuma pasonan importante pa salud preventivo na Aruba!
- Aruba tambe ta ofrece 3 programa preventivo:
- BOB- programa di screening pa detecta cancer di pecho.
- BOCA- programa di screening pa detecta cancer na boca di matriz.
- CORESA- programa di screening pa detecta cancer na tripa cerca hende muhe y hende homber.
E programanan di screening ta mara na e edadnan unda mas presente e tipo di cancer ta y ta cai bou di AZV.
