Awe tin eleccion di directiva nobo di SEPPA pa periodo 2025-2028

Magaly Brito, Secretaria General:

ORANJESTAD (AAN) Sindicato SEPPA a tuma un decision for di aña pasa caba, durante nan ultimo Congreso, unda a fiha e periodonan den cual eleccion ta tuma lugar.

   Magaly Brito, Secretario General, a splica den entrevista cu DIARIO, cu e ta papia di periodonan pasobra ya tabata tin, anteriormente, e caminda cu Congreso ta pidi pa eleccion di directiva, pero nan no a haya tur e candidatonan rekeri pa esaki.

Awe, diabierna 11 di juli 2025, tin eleccion di un directiva nobo di SEPPA, di 8’or di mainta pa 5’or di atardi.

“E biaha aki, for di Mei caba, tin preparacionnan y nos a anuncia e eleccion aki, y ultimo e candidaturanan a keda estableci  y e ta pasa over pa e Comite, pa haci e preparacionnan necesario.

E eleccion pa e directiva lo ta awe diabierna cuminzando pa 8’or di mainta te 5’or di atardi. Nos tin diferente urna cu lo trata di yega mas pronto posible na nos miembronan, p’asina duna nan oportunidad pa vota pa nan candidatonan, cu nan ta kere cu den e siguiente tres añanan (2025-2028) nos dilanti, por hiba un control riba e trabaonan cu ta wordo ehecuta pa e Comite”, Magaly Britto a duna di conoce.