Directora di Departamento di Impuesto:
ORANJESTAD (AAN): Un tema cu atrobe ta riba mesa ta esun di 'other accommodations' cu ta regarda na casnan of apartamentonan cu ta wordo poni riba plataformanan internacional cu e meta di huur nan pa turista como tambe hende local.
Directora di Departamento di Impuesto, Luenne Gomez-Pieters, a laga sa enfaticamente cu esnan cu ta haya ganashi door pone nan propiedad disponibel pa huur riba entre otro, Airbnb y Booking.com, cu nan tambe tin cu paga impuesto.
El a agrega cu nan a compronde cu e gobierno saliente den pasado tabata kier a bin cu un sistema di 'vergunning' cu ta otorga permiso na tur esnan cu ta huur nan cas of apartamento riba un di e plataformanan menciona. Esaki sigur ta algo cu lo por wordo considera mirando cu tin un tiki mas di control cu esnan cu ta drenta riba e tereno aki y cu ta eherciendo un actividad economico.
No mester pensa solamente riba impuesto, pero tambe riba tin un bista di cuanto propiedad ta wordo gehuur den forma asina y riba aspectonan di seguridad como di higiena, Gomez-Pieters a indica.
Directora di DIMP a duna di conoce cu nan ta registra pa 'toeristenheffing' pa cada aña casi 253 contribuyente nobo. Un contribuyente no necesariamente kiermen un 'listing'. Un contribuyente por tin 2 pa 3 apartamento of 2 pa 3 cas.
El a sigui bisa cu desde 2022 bay ariba tin un promedio di 200 contribuyente nobo pa 'toeristenheffing'. E percepcion eyfo por ta cu DIMP no ta haciendo nada. Pero den tur transparencia mester publica kico ta e esfuersonan riba e tereno aki y con esaki ta refleha tambe den entrada.
Si hotelnan no ta raportando e mesun cantidad di ocupacion di turistanan tin otro hende cu si ta raportando entrada. Entrada di 'toeristenheffing' a subi compara cu aña pasa, el a indica.
DIMP ta den combersacion cu e organisacionnan manera AHATA, ATA, pa por duna nan e confirmacion di e trabao cu ta wordo haci riba e tereno aki. Siman pasa tabatin un reunion cu e directiva di ATA caminda a duna un bista di loke DIMP a bin ta haci. Tambe nan ta bezig cu auditoria, sinembargo mester tene cuenta cu ta solamente 20 trahador pa henter Aruba. Nan ta limita. Dos trahador di e 20 aki, conhuntamente cu nan hefe ta enfoca completamente riba e sector aki, el a bisa.
Gomez-Pieters a remarca cu diferente contribuyente cu no ta registra, cu no ta pagando of no ta pagando completamente nan lo haya un cobransa adicional y boet pa esnan cu nan ta cumpli cu nan obligacion di paga impuesto.
Tin otro sectornan manera esun di construccion cu tambe tin falta di cumplimento ariba tereno di 'loonbelasting'. Tin taxistanan , UTV's, ATV's y otro tipo di sector manera casino, hotel cu DIMP ta bezig cu nan pa loke ta cumplimento di nan obligacion di paga impuesto, Gomez-Pieters a finalisa bisando.
