ORANJESTAD (AAN) – Crisis Team ta den consulta cu Conseho Supremo Electoral (C.S.E), den sentido cu e proceso di votacion mester wordo organiza na tal manera, cu e votadornan keda safe pa loke ta trata Covid-19.
“Esey si nos a bisa, y esey si nos ta para ariba y nan tin reunion tur siman, pa percura pa tin mas urnanan, y cu e urnanan no bira demasiado grandi y pa bin cu cierto sugerencia di horario pa bay vota. E no ta un instruccion pasobra ley ta bisa cu bo tin di 7 pa 7 of di 8 pa 7 pa bay vota. Pero toch cada hende ta bay haya un sugerencia pa bay vota, y si tur hende bay segun e sugerencia no ta bay tin aglomeracion. Pero si bo no por motibo di trabao of cualkier otro asunto, bo por bay den otro ora trankilamente”, Minister Presidente Evelyn Wever-Croes a acentua.
Asina, Prome Minister tin entendi cu ta bay tin cierto cambionan den e proceso pa evita aglomeracion y percura pa tur votador ta safe pa Covid-19.
“Pero pa loke ta e duda cu a wordo treci riba e integridad di nos sistema electoral mi ta lamenta esey, pasobra no tabata tin motibo y mi ta pidi pa esnan cu a trece e noticia pa aclari'e tambe. Ami no por haci esey pa nan, pasobra ami no ta doño di curpa. Pero mi si ta kere cu ta importante pa nos no bay crea panico innecesario” e mandatario a relata.
