ORANJESTAD(AAN)—E fecha di eleccion a wordo adelanta cu algun luna. Pero hecho ta, cu segun nos leynan na 2021 Aruba mester a bay urna electoral pa dicidi kico e ta haci cu su futuro.
E sistema electoral ta absoluto. Cada persona cu deposita su voto, ta cumpli cu e libertad cu e Pueblo di Aruba tin, pa dicidi kico lo pasa cu e pais.
2017 a confirma e responsabilidad cu eleccion liber ta encera.
Na 2017 Aruba ya no tabata tin e autonomia total pa cual el a lanta para un dia y exigi Status Aparte. Na 2017, ya Hulanda a pone Aruba bou supervision y esaki a scapa Aruba di un desaster total.
Si na 2009 y 2013 Pueblo di Aruba a bisa Mike Eman cu e por haci y deshaci cu Aruba manera e kier, na 2017 resultado di eleccion a kita for di Mike Eman e posibilidad pa e goberna Aruba sin coalicion.
Esaki a haci cu Mike Eman, cu a gana eleccion cu un margen masha chikito, a hala atras. Pero Mike Eman mester tabata bon na haltura di loke el a laga atras pasobra hasta e cifranan cu el a fabrica pa 2018, Hulanda a scrap como fantasia.
Mike a nenga di forma un gobierno cu otro partido y Evelyn Wever-Croes a wordo acerca pa tuma e encargo di dirigi e gobierno nobo.
Si tuma nota di e campaña cu Wever-Croes y su partido MEP a tuma pa yega na eleccion 2017, mester bisa cu e tabata bon na haltura cu bira Prome Ministro di Aruba lo a exigi pa e dirigi e gobierno cu lo a ricibi un ruina cu e mester a transforma den un fortalesa.
Propaganda politico nos ta haci? Lubida!
Rapportnan y cifranan ta papia un palabra cla. Na 2017 Evelyn Wever-Croes, Mike Eman, mundo politico di Aruba, di Reino y hasta di mundo, tabata na haltura cu ta un desastre financiero Aruba tabata.
Ministro Hulandes Raymond Knops, conoci na Hulanda como un persona cu sigur no mester drenta servicio diplomatico, a bisa cu Aruba tabata bankroet si no tabata tin Hulanda.
E herencia cu Evelyn Wever-Croes mester a acepta tabata, un Aruba sin entrada of salida financiero. Un pais bancarota cu tabata landa den piscina di Reino mara na life vest di supervision Hulandes.
Economia di Aruba tabata depende di turismo, cu sigur no tabata bini di Venezuela mas, pasobra ta refugiado Nicolas Maduro a manda Aruba hunto cu su team di Citgo, cu polis internacional tabata busca.
Kico lo a pasa si Evelyn Wever-Croes a dicidi cu e no ta forma gobierno? Eleccion nobo? Medidanan di Reino si Aruba no por a goberna su mes?
Na 2017 Evelyn Wever-Croes tabata un persona relativamente hoben cu ainda por a sigui traha riba un carera cu ta produci bon placa y un dushi bida.
El a forma un coalicion, cu por a bira un desaster, pero e mes a yuda soluciona tur loke por a bira desaster.
El a enfrenta tambe Reino, Covid-19, caida total di turismo, e reto di tene un coalicion diversifica na bida y ta construi un muraya di beton a base di un Masterplan pa Aruba.
Nos no por bisa kico lo pasa si e keda Prome Ministro por lo pronto. Nos por bisa si kico lo a pasa cu Aruba si Evelyn Wever-Croes no a bira Prome Ministro di Aruba.
