ORANJESTAD (AAN): Diamars, e Centronan pa e Control y Prevencion di Malesanan na Merca (CDC) a publica algun pauta importante pa esnan cu ta completamente vacuna contra Covid-19 y cu ta biba na Merca of cu ta bishita Merca.
Sinembargo, ta bon pa cuminsa tene cuenta cu e situacion pa tene cuenta cu e puntonan aki ora cu e autoridadnan na Aruba anuncia cu ta posibel tambe sigui e mesun posibilidadnan cu tin aworaki na Merca.
Aworaki mester sigui cumpli cabalmente cu locual Crisis Team y Departamento di Salud ta indica ta mihor pa Aruba.
Tin varios actividad cu CDC a bisa cu por realisa di un manera mas safe, y te hasta sin distancia fisico, y incluso sin bisti tapaboca.
Nan ta remarca cu e bishitanan y actividadnan den aire liber ta representa un risico minimo pa e personanan cu ta completamente vacuna of pa esnan cu ta rond di nan.
CDC ta indica cu:
- Por reuni den espacionan interior cu personanan totalmente vacuna sin usa tapaboca ni permanece na 1,5 mester di distancia.
- Por reuni den espacionan interior cu personanan no vacuna di cualkier edad perteneciente na otro hogar (por ehempel, bishita un grupo di familiarnan cu ta biba hunto) sin usa tapaboca ni mantene na 1,5 meter di distancia, a menos cu algun di e personanan aki of cualkier di e personanan cu cual nan ta convivi tin mayor riesgo di bira malo gravemente pa motibo di Covid-19.
- Por reuni of organiza actividadnan den aire liber sin necesidad di uza un tapaboca, excepto den cierto espacionan y eventonan cu aglomeracion grandi.
- Si tabata den contacto cu un persona cu tin COVID-19, no mester mantene leu di e demas personanan of realiza un prueba di deteccion a menos cu tin sintomanan.
No obstante, si abo ta biba den un entorno grupal (manera un institucion coreccional of di detencion of un hogar grupal) y ta cu un persona cu tin COVID-19, bo mester isola bo mes pa 14 dia y haci un prueba di deteccion, inclusive si no tin sintomanan.
Por lo general, ta considera cu e personanan tin e vacunacion completo:±
Dos siman despues di e di dos dosis di un serie di 2 dosis, manera e vacunanan di Pfizer of Moderna, of
Dos siman despues di ricibi un vacuna di dosis unico, manera e vacuna Janssen di Johnson & Johnson
Si bo no ta reuni e rekisitonan aki, Bo NO tin e vacuna completo. Bo mester sigui tuma tur e precaucionnan te ora cu bo ta totalmente vacuna.
Kico bo mester sigui haci?
Ora di a completa e vacunacion:
- Mester sigui proteha bo mes y e hendenan rond di bo den hopi situacion mediante e uzo di tapaboca. Mester ta mas cauteloso den e siguiente situacionnan: den lugarnan publico cera, ora cu bo ta reuni den un lugar cera cu personanan cu no ta vacuna (inclui muchanan) di mas di un hogar. Ora cu bo ta reuni den un lugar cera cu un persona cu no ta vacuna y tin un riesgo mayor di bira malo gravemente door di Covid-19 of cu ta biba cu un persona di riesgo.
- Mester di e mesun manera evita e reunionnan cu hopi hende den espacionan cera.
- Si bo ta viaha mester sigui tur medida pa proteha bo mes y e otronan. Di igual manera lo exigi bo e uzo di tapaboca den avionnan, autobus, trainnan y otro medionan di transporte publico cu ta drenta of sali di Merca
- Mester sigui atento na e sintomanan di Covid-19 specialmente si tabata tin contacto cu un persona malo. Si tin sintomanan mester haci e test di Covid-19, ademas di keda isola na cas.
- Mester sigui cumpli cu e reglanan di bo lugar di trabao.
