Procedura y reglanan pa dia di Eleccion diabierna awo

Conseho Electoral Aruba:

ORANJESTAD (AAN): Conseho Electoral Aruba ta informa tur votado pa sigui e

siguiente procedura y reglanan pa garantisa un proceso democratico pa Eleccion dia 6 di

December 2024.

   Proceduranan:  Esaki ta e procedimentonan cu bo tin di haci:

1. Entrega bo documentonan

○ Entrega na e Presidente di e urna bo carchi di voto y identificacion valido

2. Registro di bo voto

○ Presidente y e di dos miembro di e urna electoral lo controla y confirma e

number riba e carchi di voto y bo fam den e registro di votadonan

3. Ricibi bo papel di voto (stembiljet)

○ Mester drenta un hoki liber momento cu ricibi bo papel di voto (stembiljet) dobla

di tal manera cu e firma di e Presidente di Conseho Electoral ta visibel.

4. Scoge y Vota

○ Habri e stembiljet den e hoki y marca e ronchi na banda robes di e nomber di e

candidato di bo escogencia cu e potlood cora cu tin den e hoki.

5. Fout mientras votando?

○ Si bo a haci un fout mientras bo ta votando, avisa e Presidente di e urna di pa ricibi e

oportunidad pa vota di nobo. Esaki ta permiti 1 biaha solamente pa cada votado.

6. Deposita bo voto

○ Prome cu sali di e hoki mester dobla e stembiljet bek den forma cu e firma di e

Presidente di Conseho Electoral ta mustra y deposit'e di biaha den e 'buzon'

electoral (stembus). Si NO cumpli cu e esaki e papel di voto NO lo wordo uza y

e voto ta bay perdi (onbruikbaar gemaakt).

7. Mester di asistencia?

○ Si pa motibo di incapacidad fisico (p.e. limitacion di bista o invalidez etc.) tin

mester di yudansa ora di vota, bo persona mes tin cu indica esaki na e

Presidente di e urna pa por haya asistencia di un persona di bo confianza.

   Reglanan: E Presidente di cada urna ta encarga cu mantencion di ordo den e urna. Sigui su instruccionnan y e siguiente reglanan pa garantisa un proceso di votacion trankilo, liber y secreto.

NO ta permiti pa lo siguiente: (*) No uza celular y/of saca potret den urna. (*) No haci grabacion den urna. (*) No mag di come y/of bebe den urna.  (*) No mag di huma den urna.