Keyla Helder, Hefe di Promocion di Salud na DVG:
ORANJESTAD (AAN) Keyla Helder, Hefe di Afdeling Health Promotion, na Departamento di Salud (DVG), den entrevista cu DIARIO tocante e Conferencia “Sex Worker's Health & Safety” na Aruba, a splica cu esaki tabata un dia unda kier a trece concientizacion riba e aspecto di salud y seguridad di e damanan di compania.
E ta haya algo tremendo cu DVG y Universidad di Aruba a colabora den e estudio cu a wordo haci dedica na e damanan aki, y wak kico ta e partinan di ley cu ta wordo enfoca na kico ta e servicio cu nan ta duna, y con por preveni cierto riesgonan pa salud publico, den e trabao cu nan ta eherce.
“Nos ta contento cu nos por a colabora cu diferente organizacion existente. Tres di nan a presenta Diaranson, y un tremendo estudio a wordo realiza en colaboracion di DBG, nan tambe a haci entrevista cu e hendenan di DIMAS, KPA, cu e damanan di compania mes. Y loke ta importante ta e parti di comunicacion, cu ta wordo eherce entre e ciclonan aki, y tambe kico ta e servicionan cu ta wordo ofreci pa nan na Aruba. Ki leynan esaki ta encera, ki parti di seguridad mester tene na cuenta, e parti di nan salud, si nan ta eherce e trabao aki na un manera corecto”, Helder a relata.
Esaki ta encera si nan ta uzando proteccion, si nan ta vacuna, si nan ta haci nan mesun testnan tambe, pasobra nan servicio ta wordo duna na un grupo un tiki grandi, aki na Aruba. “Pero nos kier pa wordo haci tambe na un manera sano pa no perhudica nos comunidad di ningun manera, y tampoco nan mes. Un di e organizacionnan tambe cu ta CNAA, cu ta parti di prevencion di traficacion di hende ta un cu tambe nos ta enfoca riba dje. Pues, nos como Departamento di Salud Publico ta hopi contento cu nos por a enfoca riba e aspecto aki, anto haci nos trabao na un manera corecto”, Keyla Helder a señala.
