Statistica di compania Forensys
ORANJESTAD (AAN): E compania local cu ta encarga pa atende accident y tambe roadservice na Aruba, esta Forensys, a keda tiki alerta pa e cantidad di accident cu nan a atende den e prome siman di Januari 2026.
E compania a bay check statistica di prome siman di Januari 2025 pa compara. E cifranan tabata asombroso.
Aña pasa den prome siman di aña, nan a registra 129 accident total na Aruba. Pero awo na 2026 den e prome siman, nan a registra total di 197 accident. E compania a indica cu esaki ta un aumento di 34,5 porciento compara cu e aña anterior.
E compania ta haci un suplica na comunidad, pa tur automobilista bay mas cauteloso riba careteranan di Aruba. Ban respeta reglamento di trafico tur momento.
Tambe nan a duna 7 punto di atencion pa tur chauffeur y ocupantenan di auto of vehiculo tene cuenta cu ne. Aki DIARIO ta reproduci e tipnan balioso aki.
(1) Bisti bo faha di seguridad tur momento.
(2) Mantene bo mes na reglamento di velocidad maximo di trafico.
(3) Respeta camindanan di preferencia.
(4) Respeta peaton, ciclista y brommer.
(5) No bebe ora di stuur.
(6) No texting.
(7) Percura pa bo seguro ta valido y na ordo.
Siman pasa DIARIO a ricibi comentario di un automobilista, cu e ta asombra pa mira asina hopi hende cu ta core auto awendia den verboden. E mes a para un persona y puntre pakico e ta coriendo den verboden, y si acaso e no a mira e borchi. E persona di habla hispano, a splica cu e ta di Venezuela, y na su pais e borchi di ‘verboden’ no ta mescos cu esun di Aruba. Pesey nan no ta catch rapidamente cu nan ta drentando un caminda di verboden.
