Durante Summit of the Future
ORANJESTAD (AAN) Prome Minister Evelyn Wever-Croes recientemente a representa Aruba y Reino Hulandes na e Summit of the Future na Nacionnan Uni na New York. Esaki ta un cumbre unda lidernan di mundo ta bin hunto y tuma decisionnan clave cu ta importante pa futuro di cada pais.
Reunion General: Prome Minister tawatin e honor di hiba palabra durante e reunion general den e General Assembly Hall y tambe a atende varios encuentro y conferencia dirigi riba futuro.
Durante e Summit of the Future e mandatario di Aruba a trece padilanti preocupacionnan y retonan cu Aruba como pais ta mira pa futuro, manera costo di bida halto, problemanan social y e efectonan di e cambio climatico.
Posicion di hende muhe y mucha muhe: Un di e puntonan importante cu e mandatario a enfoca riba dj’e tabata e posicion di hende muhe y mucha muhe y kico tur tin di haci pa hende muhe y mucha muhe tin oportunidad igual cu e hende homber.
“No por bisa cu bo pais ta den desaroyo y ta progresando si tin un grupo den bo comunidad cu no ta progresando mescos cu otronan”, Prome Minister a subraya.
Encuentro cu hobennan: Otro encuentro tabata cu hobennan unda a enfoca riba derechonan humano, oportunidad igual y e responsabilidad di adultonan pa proteha e planeta.
Hobennan ta demanda e gobernantenan pa cuida e mundo pa asina por entrega esaki na e futuro generacion den bon estado of hasta miho ainda cu e ta na e momento aki.
e-Government: Prome Minister tambe a elabora durante un encuentro riba e tema di digitalisacion y Inteligencia Artificial. Un tema importante pa Aruba cu ta aplicando esaki caba den e proyecto di e-Government, unda ta trahando pa digitalisa procesonan di Gobierno y mehora e servicio.
E mandatario ta menciona cu por medio di esaki procesonan actual di oficinanan di Gobierno lo por worde haci desde e comodidad di cas na un computer. Pero lo sigui tene cuenta cu personanan cu no tin aceso na un computer, worde atendi na un oficina di gobierno den nan bario.
“Tabata un honor grandi pa un biaha mas representa Aruba riba escenario internacional, Aruba ta goza di un respet enorme. Mi tin 7 aña ta haciendo e trabao aki y por mira cu despues di e 7 añanan aki di trabao intensivo, di crea relacionnan cu e diferente agencianan di Nacionnan Uni, cu Secretario General di Nacionnan Uni señor Antonio Guterres, cu diferente presidente y prome ministernan di diferente pais, e netwerk aki a duna fruto y ta di gran ayudo pa Aruba. Por a logra palabracionnan concreto y importante pa Aruba por sigui haya ayudo pa asina por mehora e calidad di bida di cada ciudadano di nos pais. Y esey ta un logro hopi importante”, Prome Minister a expresa.
